અંધાશ્રમ પાસે મકાનમાં આગચંપી કરનાર ત્રણ સામે મહિલાએ કરી ફરિયાદ

Author: નોબત સમાચાર

અંધાશ્રમ પાસે મકાનમાં આગચંપી કરનાર ત્રણ સામે મહિલાએ કરી ફરિયાદ

સામાપક્ષનો ટોળા સામે હુમલો, અપમાનિત કર્યાની રાવઃ

જામનગર તા.૨ : જામનગરના અંધાશ્રમ ફાટક પાસે મંગળવારે રાત્રે એક મકાન પર પથ્થરમારો કરી આગચંપી કરાઈ હતી. પોલીસ તથા ફાયરબ્રિગેડ દોડી ગયા હતા આ બાબતે ગઈકાલે બંને પક્ષે સામસામી ફરિયાદ નોંધાવી છે. જેમાં એક મહિલાએ પોતાના મકાનને આગ ચાંપી નુકસાન કરવા અંગે ત્રણ સામે રાવ કરી છે. જ્યારે સામાપક્ષે એક મહિલા સહિત સાત સામે હુમલાની ફરિયાદ નોંધાવી છે.

જામનગરના અંધાશ્રમ નજીક આવેલા ફાટક પાસેની શેરી નં.રમાં હનુમાન ચોકમાં રહેતા હકુબા રણજીતસિંહ જાડેજા નામના મહિલાએ ત્યાં જ રહેતા આશિષ વારસાકીયા, મહેશ વારસાકીયા અને દીપક ગોહિલ સામે સિટી સી ડિવિઝન પોલીસ સ્ટેશનમાં ફરિયાદ નોંધાવી છે.

તેઓએ ફરિયાદમાં જણાવ્યા મુજબ તેમનો પુત્ર દિવ્યરાજ અને આશિષ જ્યારે નાના હતા ત્યારે ઝઘડી પડ્યા હતા ત્યારપછી બંને વચ્ચે નાના મોટા ઝઘડા થતાં રહેતા હતા. તેનો ખાર રાખી મંગળવારની રાત્રે આશિષ, મહેશ તથા દીપકે ઈંટ તથા પથ્થરના હકુબાના મકાન પર ઘા કરવા ઉપરાંત તે મકાનને આગચંપી કરી હતી. પોલીસે બીએનએસની કલમ ૩૨૬ (જી), ૨૯૬ (બી), ૫૪ હેઠળ ગુન્હો નોંધ્યો છે.

આ ફરિયાદની સામે રાજુભાઈ દેવાભાઈ વારસાકીયાએ વળતી ફરિયાદ નોંધાવી છે. જેમાં તેઓએ જણાવ્યા મુજબ ગઈકાલે સવારે તેઓ પોતાના ઘરમાં હતા ત્યારે દિવ્યરાજસિંહ, હરપાલસિંહ, હકુબા, ત્રણ અજાણ્યા શખ્સ અને હરપાલનો ભાઈ ધસી આવ્યા હતા. આ વ્યક્તિઓએ ઘરમાં ઘૂસી જઈ પાઈપ વડે હુમલો કરી છરીથી ઈજા પહોંચાડી હતી. હકુબાએ જ્ઞાતિ પ્રત્યે અપમાનજનક શબ્દો કહ્યા હતા અને જાનથી મારી નાખવાની ધમકી આપી હતી. જ્યારે બાકીના ત્રણ અજાણ્યા શખ્સે ઢીકાપાટુથી માર માર્યાે હતો. આ ટોળાએ દીપક ગોહિલના ઘરમાં સામાન તોડી ફોડી નાખ્યો હતો.

પોલીસે આ ફરિયાદ એટ્રોસિટી એક્ટ તથા બીએનએસની કલમો હેઠળ રજીસ્ટરે લઈ આરોપીઓની શોધ હાથ ધરી છે.

જો આપને આ પોસ્ટ ગમી હોય તો શેર કરો...