જનતા સાથે અન્યાયઃ પ્રાથમિક આરોગ્ય કેન્દ્ર વાચ્છુ શિફટ કરી દેવાયુ

Author: નોબત સમાચાર

જનતા સાથે અન્યાયઃ પ્રાથમિક આરોગ્ય કેન્દ્ર વાચ્છુ શિફટ કરી દેવાયુ

આગેવાનોનું મૌન લોકોનો હક છીનવી રહ્યું છેઃ

મીઠાપુર તા. ૨: દેવભૂમિ દ્વારકા જિલ્લાનાં દ્વારકા તાલુકાનાં સૂરજકરાડી ગામમાં વર્ષોથી ચાલતા પ્રાથમિક આરોગ્ય કેન્દ્રને વાચ્છુ ગામે શિફ્ટ કરી દેવામાં આવ્યું છે. સૂરજકરાડીમાં પ્રાથમિક આરોગ્ય કેન્દ્ર બંધ થઇ જતા સ્થાનિકોને સરકારી દવાખાનામાં સારવાર મેળવવા હવે ઓખા, દ્વારકા કે વાચ્છુ જવુ પડશે.

સૂરજકરાડીથી ઓખા ૧૧ કિ.મી., દ્વારકા ૨૨ કિ.મી. અને વાચ્છુ ૩૩ કિ.મી. દૂર છે. એટલેકે સૂરજકરાડીમાં કોઇને પ્રાથમિક આરોગ્ય કેન્દ્રમાં સારવાર લેવી હોય તો ઓછામાં ઓછુ ૧૧ કિ.મી.નું અંતર કાપવુ પડે. કૂતરૂૂ કરડે તો પણ લોકોએ ઓખા, દ્વારકા કે વાચ્છુ ધક્કો ખાવો પડે એવી સ્થિતિની ચર્ચા જાગી છે. ઉલ્લેખનીય છે કે હાલ રાશનકાર્ડ કે.વાય.સી. અને આધારકાર્ડની કામગીરી માટે પણ સૂરજકરાડીનાં લોકોને દ્વારકા ધક્કા ખાવા પડે છે.

પ્રાથમિક આરોગ્ય કેન્દ્ર છીનવાઇ જવા બાબતે તાલુકા આરોગ્ય અધિકારીનો સંપર્ક સાધવામાં આવતા તેમણે સરકારની સૂચના હોવાથી આરોગ્ય કેન્દ્ર વાચ્છુ શિફ્ટ કર્યુ હોવાનું જણાવ્યુ હતું. આરોગ્ય કેન્દ્ર છીનવી લઇને સૂરજકરાડીની ૩૦ હજારની વસ્તી સાથે અન્યાય થયો છે એવો પ્રચંડ સૂર વહેતો થયો છે અને આ મુદ્દે આગેવાનોનું મૌન પણ જનતાની નારાજગીને વધુ પ્રબળ બનાવી રહૃાુ છે.

જો આપને આ પોસ્ટ ગમી હોય તો શેર કરો...