જામનગરના પરિણીતાને આત્મહત્યાની દુષ્પ્રેરણા આપવાના ગુન્હામાં થયો છૂટકારો

Author: નોબત સમાચાર

જામનગરના પરિણીતાને આત્મહત્યાની દુષ્પ્રેરણા આપવાના ગુન્હામાં થયો છૂટકારો

પતિ સહિતના સાસરિયા સામે કરાઈ હતી રાવઃ

જામનગર તા.૨ : જામનગરના એક પરિણીતાએ અગિયાર વર્ષ પહેલાં ગળાફાંસો ખાઈ આત્મહત્યા કરી લીધી હતી. તેણીના પિતાએ દહેજ તથા ઘરકામ બાબતે ત્રાસ આપી પોતાની પુત્રીને મરી જવા માટે મજબૂર કરવા અંગે પતિ, સાસુ, જેઠ વગેરે સામે ફરિયાદ નોંધાવી હતી. તે કેસ ચાલી જતાં અદાલતે આરોપીઓનો છૂટકારો ફરમાવ્યો છે.

જામનગરના દિગ્વિજય પ્લોટ વિસ્તારમાં રહેતા વિજય ભરતભાઈ સેવાણી નામના યુવાનના પત્નીએ ગઈ તા.૧૮-૭-૧૩ના દિને પોતાના ઘરમાં ગળાફાંસો ખાઈ આત્મહત્યા કરી લીધી હતી. તેણીના પિતાએ પોતાની પુત્રીને દહેજ તથા ઘરકામ બાબતે મેણા મારી મરી જવા માટે મજબૂર કર્યાની ભરત હરીચંદ સેવાણી, વિજય ભરતભાઈ, કિશોર હરીચંદ, સાસુ સુનિતાબેન સામે રાવ કરી હતી. પોલીસે આઈપીસી ૩૦૬ હેઠળ ગુન્હો નોંધ્યો હતો.

ઉપરોક્ત કેસ ચાલવા પર આવતા ફરિયાદ પક્ષે પચ્ચીસ દસ્તાવેજી પુરાવા અને ૨૦ મોખિક પુરાવા રજૂ કર્યા હતા. બચાવપક્ષે દલીલ કરી હતી કે, જુબાનીઓમાં વિરોધાભાસ જણાઈ આવ્યો છે. તેમજ સાસરીયા પક્ષે ત્રાસ આપી પરિણીતાને મરી જવા માટે મજબૂર કરી હોય તેવું નિઃશંક પણે સાબિત થતું નથી. અદાલતે તે દલીલ ગ્રાહ્ય રાખી આરોપી ભરત હરીચંદ, કિશોર ભરત, વિજય ભરત સેવાણી, સુનિતાબેનનો છૂટકારો ફરમાવ્યો છે. આરોપી તરફથી વકીલ અશોક એચ. જોષી રોકાયા હતા.

જો આપને આ પોસ્ટ ગમી હોય તો શેર કરો...