ગ્રામ્ય તેમજ શહેરી વિસ્તારોમાં ગરીબ પરિવારો માટે ઉપયોગી ગ્રાન્ટેડ શાળાઓ પર ગ્રાન્ટ કાપનું હથિયાર

Author: નોબત સમાચાર

ગ્રામ્ય તેમજ શહેરી વિસ્તારોમાં ગરીબ પરિવારો માટે ઉપયોગી ગ્રાન્ટેડ શાળાઓ પર ગ્રાન્ટ કાપનું હથિયાર

ગુજરાત સરકારનો તઘલખી આદેશ!

ખંભાળિયા તા. રરઃ રાજ્ય સરકાર દ્વારા રાજ્યના અંતરિયાળ તથા ગ્રામ્ય વિસ્તારમાં ગરીબ મધ્યમ પરિવારોના માટે ખૂબ જ ઉપયોગી ગણાતી ગ્રાન્ટેડ શાળાઓ પર ગ્રાન્ટ કાપનું હથિયાર ચલાવીને સેલ્ફ ફાયનાન્સ શાળાઓને પ્રોત્સાહનના ડોઝનું આડકતરૂ શસ્ત્ર ચલાવ્યું છે, જેથી ગ્રામ્ય પંથક-શહેરમાં મરવાના વાંકે જીવતી ગ્રાન્ટેડ શાળાઓનો મૃત્યુઘંટ વાગી જશે.

સરકારી નિશાળોમાં એક વર્ગમાં ૧૦/૧ર સંખ્યા હોય તો પણ શાળા ચાલે છે, જ્યારે ગ્રાન્ટેડ શાળામાં નવા નિયમ પ્રમાણે શહેરી વિસ્તારમાં ૮૦ ટકા અને ગ્રામ્ય વિસ્તારમાં પપ ટકા હાજરી હશે તો જ ૧૦૦ ટકા ગ્રાન્ટ મળશે. જો ૬૦ ટકાથી ઓછી શહેરમાં તથા ગ્રામ્યમાં ૪૦ ટકાથી ઓછી હશે તો ૧૦૦ ટકા ગ્રાન્ટ કાપ થશે.

હાલ રાજ્યમાં ગ્રાન્ટેડ શાળાઓને ૧ થી પ વર્ગ હોય તો વર્ગ દીઠ માસિક ૩ હજાર, પાંચથી વધુ ૩૦ સુધી હોય તો રપ૦૦ વર્ગદીઠ માસિક અપાય છે. ૩૦ થી વધુને ૧૬પ૦ રૂપિયા વર્ગદીઠ અપાય છે. તેના બદલે હવે આ નવો નિયમ લાગુ પડશે. ર૦૧૭ માં આ નિયમો લાગુ પડ્યા હતાં જે પછી તાજેતરમાં નવો પરિપત્ર કરીને ગ્રાન્ટો અંગે કડક નિયમો નક્કી કર્યા છે. એમ કહેવાય છે કે, બાળકોની શાળામાં નિયમિત હાજરીઓ થાય તે માટે આ કડક પગલું લેવાયું છે પણ ગ્રાન્ટેડ શાળાઓ જે દર વર્ષે બંધ થતી જાય છે તેમાં ઉમેરો જ થશે.

જો આપને આ પોસ્ટ ગમી હોય તો શેર કરો...