પટણામાં ખાનસર અદાલતના શરણેઃ સરેન્ડર અથવા આગોતરા જામીનની અરજી

Author: નોબત સમાચાર

પટણામાં ખાનસર અદાલતના શરણેઃ સરેન્ડર અથવા આગોતરા જામીનની અરજી

૫ોતે જ ફાયરીંગ કરાવ્યુ હોવાનો પ્રતિસ્પર્ધીનો દાવો

પટણા તા. ૬: પટણામાં ખાનસર અને પ્રતિસ્પર્ધી કોચિંગ કલાસ વચ્ચેની ખેંચતાણ હવે અદાલતમાં પહોંચી છે. ખાનસર આગોતરા જામીન મેળવવા અદાલતની શરણે પહોંચ્યા છે. અથવા તેઓ કોર્ટ સમક્ષ સરેન્ડર કરીને જામીન માંગશે. તેવા સંકેતો છે.

પટણામાં ટયુશન કલાસીસ પર ગોળીબારના કેસમાં ફરિયાદ નોંધાયા પછી ખાન સર સરેન્ડર કરવા કોર્ટ પહોંચ્યા હોવાના અહેવાલો છે.

બિહારની રાજધાની પટણામાં આવેલી પ્રખ્યાત કોચિંગ ઇન્સ્ટિટ્યૂટ 'ખાન ગ્લોબલ સ્ટડીઝ'માં થયેલી તોડફોડ અને કથિત ફાયરિંગના મામલે હવે કાનૂની ગરમાવો આવી ગયો છે. આ કેસમાં પટણા પોલીસ દ્વારા એફઆઈઆર નોંધાયા બાદ, દેશભરમાં જાણીતા શિક્ષક ફૈઝલ ખાન (ખાન સર) એ કાનૂની રસ્તો અપનાવ્યો છે. આજે બપોરે પોતાના વકીલો સાથે તેઓ આત્મસમર્પણ (સરેન્ડર) કરવા માટે પટણાની સિવિલ કોર્ટમાં પહોંચ્યા હોવાના અહેવાલો છે.

કોર્ટ પરિસરમાં મીડિયાના પ્રવેશ પર પ્રતિબંધ હોવાને કારણે ખાન સરને અંદર જતા કોઈ જોઈ શક્યું નહોતું. પરંતુ કોર્ટના અંદરના સૂત્રો પાસેથી મળતી માહિતી અનુસાર, ખાન સર સિવિલ કોર્ટમાં જજ અનુરાગ વર્માની અદાલતમાં વકીલો મારફતે આગોતરા જામીન માટેની અરજી પણ દાખલ કરી શકે છે.

આ સમગ્ર વિવાદની શરૂઆત મંગળવારે (૨ જૂન) રાત્રે થઈ હતી, જ્યારે ૧૫ થી ૨૦ અજ્ઞાત લોકોના એક જૂથે પટણા સ્થિત ખાન સરની કોચિંગ ઇન્સ્ટિટ્યૂટના કેમ્પસ પર હુમલો કરીને ભારે તોડફોડ અને પથરાવ કર્યો હતો. આ ઘટના બાદ સોશિયલ મીડિયા પર એક વીડિયો વાયરલ થયો હતો, જેમાં કોચિંગના બે સિક્યોરિટી ગાર્ડ કથિત રીતે હવામાં ફાયરિંગ કરતા જોવા મળ્યા હતા. આ મામલે કાર્યવાહી કરીને પટણા પોલીસે ગુરુવારે જ બંને ગાર્ડની અટકાયત કરી લીધી હતી.

પટણાના સિનિયર સુપ્રિટેન્ડન્ટ ઓફ પોલીસ કાર્તિકેય શર્માએ શુક્રવારે સત્તાવાર રીતે પુષ્ટિ કરી હતી કે કોચિંગમાં થયેલા હંગામા અને ફાયરિંગના કેસમાં શિક્ષક ફૈઝલ ખાન (ખાન સર) ને નામજોગ આરોપી બનાવીને એફઆઈઆર નોંધવામાં આવી છે. એસએસપીએ એમ પણ જણાવ્યું હતું કે આ કેસમાં પોલીસ ટૂંક સમયમાં ખાન સરની પૂછપરછ કરશે, જો કે કઈ કઈ કલમો લગાવવામાં આવી છે તેનો ખુલાસો કરાયો નહોતો.

આ ઘટના બાદ પટણાના કોચિંગ જગતમાં ભારે ખેંચતાણ શરૂ થઈ ગઈ છે. ખાન સરે શરૂઆતમાં એવો આક્ષેપ કર્યો હતો કે તેમના ઇન્સ્ટિટ્યૂટ પર થયેલા હુમલા અને ફાયરિંગ પાછળ હરીફ કોચિંગ સંસ્થાઓનો હાથ છે. બીજી તરફ, પ્રતિસ્પર્ધી કોચિંગ સંસ્થાઓના સભ્યોએ ગુરુવારે એક પ્રેસ કોન્ફરન્સ યોજીને વળતો દાવો કર્યો હતો કે ખાન સરે પોતે જ પબ્લિસિટી મેળવવા અથવા અન્ય કોઈ કારણોસર આ આખી ઘટનાની સ્ક્રિપ્ટ રચી હતી અને તેને પ્રાયોજિત કરાવી હતી. હાલમાં ખાન સર કોર્ટના શરણે પહોંચતા પટણા પોલીસ અને કાનૂની લોબીની નજર આ કેસ પર ટકેલી છે.

જો આપને આ પોસ્ટ ગમી હોય તો શેર કરો...