પોટરીવાળી ગલી પાસે યુવાન પર સરાજાહેર છરીથી હુમલોઃ ધ્રોલમાં યુવાનને છરી બતાવાઈ

Author: નોબત સમાચાર

પોટરીવાળી ગલી પાસે યુવાન પર સરાજાહેર છરીથી હુમલોઃ ધ્રોલમાં યુવાનને છરી બતાવાઈ

નગરની યુવતીને ફોન પર ધમકી આપી સોશિયલ મીડિયા પર કરવામાં આવી બદનામઃ

જામનગર તા.૨૬ : જામનગરના ત્રણ દરવાજા વિસ્તારમાં પોટરીવાળી ગલી પાસે ગઈકાલે સાંજે બે શખ્સે સ્કૂટર પર જતાં એક યુવાનને ઝઘડો કરવો છે તેમ પૂછી છરી વડે હુમલો કરી માર માર્યાે હતો. જયારે ધ્રોલના જોડિયા નાકા પાસે પડધરીના યુવાન પર એક મોટરમાંથી ઉતરેલા શખ્સે ઢીકાપાટુથી માર મારી છરી બતાવી હતી. તે ઉપરાંત નગરની એક યુવતીને ધ્રોલના શખ્સે પોલીસ કેસમાં સમાધાન કરવાનું કહી સોશિયલ મીડિયા પર તેણી બદનામ થાય તેવું કૃત્ય કરતા અને ફોન પર ધમકી આપતા યુવતીએ પોલીસમાં ફરિયાદ નોંધાવી છે.

જામનગરના નાગનાથ નાકા વિસ્તારમાં આવેલા સ્વામીનારાયણનગરમાં રહેતા ભાવિન રોહિતભાઈ પટ્ટણી નામના ભોઈ યુવાન ગઈકાલે સાંજે ત્રણ દરવાજા વિસ્તાર માંથી પોતાના મિત્ર સાથે સ્કૂટર પર જતા હતા ત્યારે બાજુમાંથી અન્ય એક બાઈક પસાર થતું હતું. આ વેળાએ ભાવિને તેની સામે જોતા બાઈક પર જઈ રહેલા મોઈન ગામેતી અને અજાણ્યા શખ્સે સામે કેમ જુએ છે તેમ કહી ઝઘડો કરવો છે તેમ પૂછતા ભાવિને ઝઘડો નથી કરતો તેમ કહ્યું હતું.

આથી ઉશ્કેરાયેલા મોઈન તથા તેની સાથે રહેલા અજાણ્યા શખ્સે ગાળો ભાંડી ઝપાઝપી કર્યા પછી મોઈને પોતાની સાથે રહેલી છરી બહાર કાઢી એક ઘા પેટમાં ઝીંકી દીધો હતો. તે પછી બંને શખ્સે ઢીકાપાટુથી માર માર્યાે હતો. આ વેળાએ ત્યાંથી પસાર થતાં હરનીશ જેઠવા વચ્ચે પડતા તેને પણ માર મારવામાં આવ્યો હતો. ઈજાગ્રસ્ત ભાવિનને સારવાર માટે જી.જી. હોસ્પિટલમાં ખસેડવામાં આવ્યો છે. જ્યાંથી તેણે રાત્રે પોલીસમાં ફરિયાદ નોંધાવી છે. પોલીસે બંને હુમલાખોર સામે ગુન્હો નોંધ્યો છે.

રાજકોટ જિલ્લાના પડધરી ગામના બાયપાસ પાસે રહેતા ધારશીભાઈ જકશીભાઈ સાડમીયા ગઈકાલે સાંજે ધ્રોલમાં જોડિયા નાકા પાસેથી જતા હતા ત્યારે ત્યાંથી પસાર થતી એક મોટરના ચાલક સાથે સાઈડમાં ચાલવાની બાબતે થતાં મોટરમાંથી ઉતરેલા એક અજાણ્યા શખ્સે ગાળો ભાંડી ઢીકાપાટુથી માર મારવા ઉપરાંત છરી બતાવી ધક્કો મારી પછાડી દીધા હતા. તેના કારણે નજીક આવેલી દુકાનના ઓટલાનો ખૂણો વાગી જતાં ધારશીભાઈને ઈજા થઈ છે. તેઓએ ધ્રોલ પોલીસમાં ફરિયાદ કરી છે.

જામનગરના દિગ્વિજય પ્લોટ વિસ્તારની શેરી નં.૬૦માં રહેતા સુનિતાબેન ગુરૂમુખદાસ દામા નામના યુવતીએ અગાઉ પોલીસમાં એક ફરિયાદ કરી હતી. તે ફરિયાદમાં સમાધાન કરી લેવાનું કહી ધ્રોલના ચંદન વાસમાં રહેતા હેમન ઘેલાભાઈ ચાવડાએ ફોન કરી જાનથી મારી નાખવાની ધમકી આપી હતી અને આ યુવતીને સોશિયલ મીડિયા પર બદનામ થાય તેવું કૃત્ય કરતા સુનિતાબેને સિટી એ ડિવિઝન પોલીસ સ્ટેશનમાં ફરિયાદ નોંધાવી છે.

જો આપને આ પોસ્ટ ગમી હોય તો શેર કરો...