શેઠવડાળામાં સાથે રમતા બાળકો ઝઘડ્યા પછી મોટેરાઓ વચ્ચે ડખ્ખોઃ એકની હત્યા

Author: નોબત સમાચાર

શેઠવડાળામાં સાથે રમતા બાળકો ઝઘડ્યા પછી મોટેરાઓ વચ્ચે ડખ્ખોઃ એકની હત્યા

એક મહિલા સહિત છએ લાકડીઓથી કર્યાે હુમલોઃ બે યુવાનને થઈ ઈજાઃ

જામનગર તા. ૧૧: જામજોધપુરના શેઠવડાળા ગામમાં જમાઈપરા સોસાયટીમાં ગઈકાલે બે પાડોશી પરિવારના બાળકો સાથે રમતા હતા તેમાં ઝઘડો થઈ જતાં મોટેરાઓ વચ્ચે પડ્યા હતા તેમાં મામલો વધી પડતા ત્રણ ભાઈઓ પર એક મહિલા સહિત છ વ્યક્તિએ લાકડીઓથી હલ્લો કર્યાે હતો. જેમાં એક વ્યક્તિનું માથામાં લાકડી ફટકારવામાં આવતા મૃત્યુ નિપજતા આ બનાવ હત્યામાં પલટાઈ ગયો હતો. બે યુવાનને માર પડ્યો છે. હત્યાને અંજામ આપી છએય વ્યક્તિ નાસી ગયા હતા. પોલીસે હત્યા સહિતની કલમો હેઠળ ગુન્હો નોંધી આરોપીઓના સગડ દબાવ્યા છે.

જામજોધપુર તાલુકાના શેઠવડાળા ગામમાં જમાઈપરા સોસાયટીમાં રહેતા શૈલેષભાઈ ભાણજીભાઈ વિરમગામાના ભાઈ પિયુષભાઈ તથા પાડોશી પ્રકાશ બાબુભાઈ મકવાણાના બાળકો ગઈકાલે બપોરે શેરીમાં રમતા હતા.

આ વેળાએ કોઈ બાબતે બાળકો વચ્ચે ઝઘડો થઈ જતાં બંને બાળકોના વાલીઓ દોડી આવ્યા હતા. બાળકોના ઝઘડામાં મોટેરાઓ વચ્ચે ડખ્ખો થઈ ગયો હતો અને તે પછી પ્રકાશ તેમજ તેના પિતા બાબુભાઈ બચુભાઈ મકવાણા, કાનજી બચુભાઈ, રણછોડ બચુભાઈ, દયાબેન બાબુભાઈ, રવિ બાબુભાઈ નામના છ વ્યક્તિઓ લાકડી સાથે ધસી આવ્યા હતા.

ઉપરોક્ત ટોળાએ પિયુષભાઈના ભાઈ રમેશભાઈ પર હલ્લો કર્યાે હતો. આ વ્યક્તિઓએ રમેશભાઈને પકડી રાખી માથામાં લાકડી ફટકારી હતી જેથી લોહીલુહાણ બની ઢળી પડેલા રમેશભાઈ (ઉ.વ.૪૨)નું મૃત્યુ નિપજ્યું હતું. જ્યારે લાકડીઓ વડે પિયુષભાઈ તથા શૈલેષભાઈને ઈજા પહોંચાડી હતી. ગાળો ભાંડી જાનથી મારી નાખવાની ધમકી આપી છએય વ્યક્તિ નાસી ગયા હતા. કોઈએ પોલીસને જાણ કરતા શેઠવડાળાથી પીએસઆઈ વી.એન. ગઢવી તથા સ્ટાફ દોડી આવ્યા હતા. પોલીસે મૃતદેહનો કબજો સંભાળી પી.એમ. માટે ખસેડ્યો હતો. ત્યારપછી ગઈકાલે સાંજે શૈલેષભાઈ વિરમગામાની ફરિયાદ પરથી પ્રકાશ, બાબુભાઈ, કાનજી, રણછોડ, રવિ તથા દયાબેન બાબુભાઈ મકવાણા સામે આઈપીસી ૩૦૨, ૩૨૩, ૩૨૪, ૧૧૪, ૫૦૪, ૫૦૬ (ર), જીપી એક્ટની કલમ ૧૩૫ (૧) હેઠળ ગુન્હો નોંધવામાં આવ્યો છે.

જો આપને આ પોસ્ટ ગમી હોય તો શેર કરો...