ખંભાળીયા પંથકના બે મહત્ત્વના રસ્તા બિસ્મારઃ તાકીદે નવા બનાવવા ઉઠતી માંગ

Author: નોબત સમાચાર

ખંભાળીયા પંથકના બે મહત્ત્વના રસ્તા બિસ્મારઃ તાકીદે નવા બનાવવા ઉઠતી માંગ

સામાજિક અગ્રણીઓએ કરી રજૂઆતઃ

ખંભાળીયા તા. ૧૪: ખંભાળીયા પંથકના બે મહત્ત્વના રસ્તાઓ અત્યંત બિસ્માર હોય, એન અત્યંત ઉપયોગી હોય, આ બાબતે અગ્રણીઓ દ્વારા તંત્રને રજૂઆતો થયેલ છે.

ખંભાળીયાના સામાજિક લોહાણા કાર્યકર હિતેશભાઈ રાયચુરા દ્વારા જિલ્લા તંત્રને રજૂઆત કરીને ખંભાળીયાના ધરમપુર વિસ્તારમાં મહાપ્રભુજીની બેઠક પાસેથી થઈને આર.ટી.ઓ. કચેરી જતો રસ્તો અત્યંત ખાડાવાળો વિસ્તાર હોય, રોજ વાહન ચાલકો પરેશાન થતા હોય, તથા ખાડા અને જર્જરીત માર્ગથી નાના-મોટા અકસ્માતો પણ થતા હોય, રોજ અનેક ભાવિકો મહાપ્રભુજીની બેઠક દર્શનાર્થે આવતા હોય, તથા આર.ટી.ઓ.ના કામ માટે આ રસ્તે જતાં હોય, ભારે પરેશાની થતી હોય, નવો સારો રસ્તો ભ્રષ્ટાચાર વગરનો સારી ગુણવતાનો બનાવવા માટે માંગ કરવામાં આવી છે.

ખંભાળીયાથી મોવાણ જતો રસ્તો પણ બિસ્માર

ખંભાળીયાના સલાયા ગેઈટ વિસ્તારના ગઢવી જ્ઞાતિના અગ્રણી થારીયાભાઈ ગઢવી દ્વારા પણ તંત્રને ખંભાળીયાથી મોવાણ જતો રસ્તો નવો બનાવવા તથા જ્યાં સુધી આ રસ્તો નવો ના બને ત્યાં સુધી રીપેરીંગ કરાવવા માંગ કરાઈ છે.

રામનગર તરફથી મોવાણ જતો રસ્તો ખૂબ જ ખરાબ હોય, તથા જુવાનગઢ પાસે વાહનો ચાલે નહીં તેવી સ્થિતિ છે., આ રસ્તો કલ્યાણપુર જવા શોર્ટકટ હોય, મોટી સંખ્યામાં વાહન ચાલકો તેનો ઉપયોગ કરતા હોય, નવો બનાવવા તથા જ્યાં સુધી નવો ના બને ત્યાં સુધી ખાડા પૂરવા માંગ કરાઈ છે. આ રસ્તા પર એટલા ખાડા છે કે, ટુ-વ્હીલરોને પણ ચલાવવામાં મુશ્કેલી પડે છે.

જો આપને આ પોસ્ટ ગમી હોય તો શેર કરો...