ગ્રેઈન માર્કેટમાં બાઈકમાંથી રોકડ ભરેલી થેલી ચોરી જનાર શખ્સ ઝબ્બે

Author: નોબત સમાચાર

ગ્રેઈન માર્કેટમાં બાઈકમાંથી રોકડ ભરેલી થેલી ચોરી જનાર શખ્સ ઝબ્બે

કમાન એન્ડ કંટ્રોલ સેન્ટરના કેમેરાએ આરોપીના આપ્યા સગડઃ

જામનગર તા.૧૪ : જામનગર તાલુકાના મોટી બાણુંગાર ગામના એક આસામી ગ્રેઈન માર્કેટમાં બાઈક લઈઙ્મો આવ્યા પછી ટીંગાડેલી થેલીની ચોરી થઈ ગઈ હતી. તે થેલીમાં રૂ.૪૯,૫૦૦ રોકડા અને પાસબુક હતા. તે બનાવની તપાસમાં પોલીસે સીસીટીવી ફૂટેજ ચકાસતા આરોપી ઝડપાઈ ગયો છે. કડિયાવાડમાં રહેતા શખ્સે ઉપરોક્ત ચોરીની કબૂલાત આપી મુદ્દામાલ કાઢી આપ્યો છે.

જામનગર-રાજકોટ ધોરી માર્ગ પર આવેલા મોટી બાણુગાર ગામના મુકેશભાઈ ભીમજીભાઇ વાસજાળિયા નામના આસામી બુધવારે બપોરે જામનગરમાં ત્રણ દરવાજા પાસે ગ્રેઈન માર્કેટ નજીક આવેલી કિસાન અનાજ ભંડાર નામની દુકાન પાસે પોતાના બાઈક પર આવ્યા હતા. આ બાઈકમાં તેઓએ એક થેલી ટીંગાડી રાખી હતી. જેમાં તેઓના રૂપિયા ૪૯૫૦૦ રોકડા અને સેન્ટ્રલ બેન્ક ઓફ ઇન્ડિયાની પાસબુક હતી.

તે થેલી કોઈ શખ્સ કાઢી ગયાની સીટી બી ડિવિઝન પોલીસ સ્ટેશનમાં મુકેશભાઈએ ફરિયાદ નોંધાવી હતી. તે ફરિયાદની તપાસ સીટી બી ડિવિઝનના પીઆઇ પી.પી. ઝાની સૂચનાથી સર્વેલન્સ સ્ટાફે શરૂ કર્યા પછી તે વિસ્તારના સીસીટીવી ફૂટેજ ચકાસ્યા હતા અને કમાન્ડ કંટ્રોલ સેન્ટરના સીસીટીવી પણ ચેક કરતા ત્યાંથી એક શખ્સની શંકાસ્પદ અવરજવર નજરે પડી હતી.

તે પછી આ શખ્સની શોધખોળ કરાઈ રહી હતી. જેમાં ઉપરોક્ત આરોપી જુના રેલવે સ્ટેશન પાસે આવ્યો હોવાની બાતમી સ્ટાફના જયપાલસિંહ જાડેજા તથા ક્રિપાલસિંહ સોઢાને મળતા ત્યાં ધસી ગયેલી પોલીસે જામનગરના કડિયાવાડ વિસ્તારની લાખાણી શેરી નંબર ૪માં રહેતા કમલેશ ભીખુભાઈ પિત્રોડા નામના શખ્સને દબોચી લીધો હતો. તેની પૂછપરછ કરાતા તેણે ઉપરોક્ત ચીલઝડપની કબુલાત આપી છે. પોલીસે તેની પાસેથી રૂપિયા ૪૯,૫૦૦ રોકડા તથા મુકેશભાઈની બેંક ખાતાની પાસ બુક કાઢી આપી છે. પોલીસે મુદ્દામાલ કબજે કરી આરોપી કમલેશ ભીખુભાઈની ધરપકડ કરી છે.

જો આપને આ પોસ્ટ ગમી હોય તો શેર કરો...