બેડ પાસે ટેન્કરે આગળ જતી મોટરને ટક્કર મારતા સર્જાયો ત્રિપલ અકસ્માત

Author: નોબત સમાચાર

બેડ પાસે ટેન્કરે આગળ જતી મોટરને ટક્કર મારતા સર્જાયો ત્રિપલ અકસ્માત

હુડકો પાસે વૃદ્ધને મોટરસાયકલની ઠોકરઃ

જામનગર તા. ૮ઃ જામનગર-ખંભાળિયા માર્ગ પર દોઢ મહિના પહેલાં કલ્યાણપુરના સતાપર ગામના પરિવારની મોટરની પાછળ ટેન્કર અથડાઈ પડતા ત્રિપલ અકસ્માત સર્જાયો હતો. જેમાં મોટરમાં રહેલા વ્યક્તિ અને એક સ્કૂટરચાલકને ઈજા થઈ હતી. તે ઉપરાંત ગયા સપ્તાહે હુડકો પાસે એક બાઈકે વૃદ્ધને ઠોકર મારી અકસ્માત સર્જયો હતો.

દેવભૂમિ દ્વારકા જિલ્લાના કલ્યાણપુર તાલુકાના સતાપર ગામના વાડી વિસ્તારમાં વસવાટ કરતા સાજણભાઈ પીઠાભાઈ ચાવડા તથા તેમનો પરિવાર ગઈ તા.૨૧ જાન્યુ.એ બપોરે સતાપરથી એક લગ્ન પ્રસંગમાં ભાગ લેવા માટે જામનગર જઈ રહ્યા હતા.

તેઓની જીજે-૨૬-એ ૩૭૩૭ નંબરની મોટર જ્યારે ખંભાળિયા-જામનગર માર્ગ પર બેડ ગામની ગોળાઈ નજીક પહોંચી ત્યારે પાછળથી પુરપાટ ઝડપે ધસી આવેલા એક ટેન્કરે ટક્કર મારી હતી. તેના કારણે ફંગોળાયેલી મોટર આગળ જતાં જીજે-૧૦-ડીક્યુ ૪૧૯૨ નંબરના સ્કૂટરમાં ટકરાઈ પડી હતી. આ અકસ્માતમાં સાજણભાઈના પરિવારજનો તેમજ સ્કૂટરચાલકને ઈજા થઈ હતી. આ બાબતની સિક્કા પોલીસ સ્ટેશનમાં ફરિયાદ કરવામાં આવી છે.

જામનગરના મેહુલનગર વિસ્તારમાં રહેતા પ્રવીણભાઈ શિવજીભાઈ કટારમલ નામના વૃદ્ધ ગઈ તા.૨ની સાંજે ચાલીને રણજીતનગરના છેવાડે હુડકો પાસેથી જતા હતા. ત્યારે સામેથી આવી મોટર પાછળથી જીજે-૧૦-ડીજી ૪૮૫૩ નંબરનંુ બાઈક ચઢી આવ્યું હતું. તેના ચાલકને પ્રવીણભાઈને ટક્કર મારી હતી. આ અકસ્માતમાં પ્રવીણભાઈનો પગ ભાંગી ગયો છે. તેઓએ બાઈક ચાલક સામે ફરિયાદ કરી છે.

જો આપને આ પોસ્ટ ગમી હોય તો શેર કરો...