સંબંધ પૂર્ણ થયા પછી યુવતીને પજવતા સિક્કાના શખ્સને પકડી પાડતી સાયબર ટીમ

Author: નોબત સમાચાર

સંબંધ પૂર્ણ થયા પછી યુવતીને પજવતા સિક્કાના શખ્સને પકડી પાડતી સાયબર ટીમ

બોગસ આઈડી પરથી ફોટા, વીડિયો વાયરલ કર્યાઃ

જામનગર તા. ૮ઃ જામનગરની એક યુવતીએ સિક્કાના શખ્સ સાથે રહેલા સંબંધ પૂર્ણ કરતા ઉશ્કેરાયેલા આ શખ્સે તેણીના ફોટા, વીડિયો યુવતી સાથે સંકળાયેલા વ્યક્તિઓને બોગસ આઈડી મારફત મોકલાવી બદનામી શરૃ કરી હતી. તેની રાવ સાયબર ક્રાઈમ પોલીસ સ્ટેશનમાં થયા પછી આ શખ્સને દબોચી લેવાયો છે.

જામનગરમાં રહેતી એક યુવતી સાથે સંપર્કમાં રહેલા સિક્કા ગામના ગઢવીપાડામાં વસવાટ કરતા વેજાણંદ ઉર્ફે વિજય લાખાભાઈ કારીયા (ઉ.વ.રપ) નામના શખ્સ સામે તે યુવતીએ જામનગર સાયબર ક્રાઈમ પોલીસ સ્ટેશનમાં ફરિયાદ નોંધાવી હતી.

ફરિયાદમાં જણાવવામાં આવ્યા મુજબ તે યુવતી અને વિજય વચ્ચે પ્રેમસંબંધ હતો તેનો અંત લાવવા માટે યુવતીએ નક્કી કર્યા પછી વિજયે તેણીની પજવણી શરૃ કરી હતી. આ યુવતીના કેટલાક ફોટા, વીડિયો અને અન્ય કેટલાક સ્ક્રીન શોર્ટના આધારે વિજયે બ્લેકમેઈલીંગ શરૃ કર્યું હતું. તે યુવતીના સંબંધી, મિત્રવર્તુળને આ યુવતીના એક સગાના નામની આઈડી બનાવી તેના પરથી ફોટા, વીડિયો મોકલી બદનામી શરૃ કરી હતી.

ઉપરોક્ત ગુન્હાની તપાસ માટે સાયબર ક્રાઈમના પીઆઈ પી.પી. ઝા તથા તેમની ટીમના કે.વી. જાડેજા, રંજનાબેન વાઘે હાથ ધરેલી તપાસમાં વિજયનું લોકેશન મેળવી લેવાયું હતું. તે પછી આ શખ્સને પકડી પાડવામાં આવ્યો છે. તેની આઈપીસી ૩૫૪ (એ), ૩૫૪ (સી), ૫૦૦, ૫૦૪, ૫૦૬ (૧), ૫૦૯ તથા આઈટી એક્ટની કલમો હેઠળ ધરપકડ કરાઈ છે.

જો આપને આ પોસ્ટ ગમી હોય તો શેર કરો...