દુનિયાના ૪૧ દેશો પર ટ્રાવેલ બેન મૂકવાની ટ્રમ્પની તૈયારી

Author: નોબત સમાચાર

દુનિયાના ૪૧ દેશો પર ટ્રાવેલ બેન મૂકવાની ટ્રમ્પની તૈયારી

ભારતના પડોશી પાકિસ્તાન, મ્યાનમાર અને અફઘાનિસ્તાન સહિત

વોશિંગ્ટન તા. ૧પઃ અમેરિકાના રાષ્ટ્રપતિ ડોનાલ્ડ ટ્રમ્પે ૪૧ દેશો પર ટ્રાવેલ બેન મૂકવાની તૈયરી કરી હોવાથી ભારતના પાડોશીઓનું ટેન્શન વધ્યું છે.

અમેરિકાના પ્રમુખ ડોનાલ્ડ ટ્રમ્પ હવે ૪૧ દેશો પર વ્યાપકપણે મુસાફરી પ્રતિબંધ મૂકવાની યોજના અંગે વિચારી રહ્યા છે. આ પ્રસ્તાવિત નીતિ ખાસ કરીને ભારતના પાડોશી દેશો જેમ કે પાકિસ્તાન, અફઘાનિસ્તાન અને મ્યાનમારને અસર કરી શકે છે. ટ્રમ્પની નીતિ ર૦ જાન્યુઆરીએ જારી કરાયેલા એક એક્ઝિક્યુટિવ ઓર્ડરનો એક ભાગ છે જેમાં વિદેશી નાગરિકો માટે કડક સુરક્ષા તપાસ ફરજિયાત કરવામાં આવી હતી. આ આદેશમાં કેબિનેટ અધિકારીઓને ર૧ માર્ચ સુધીમાં એવા દેશોની યાદી સુપ્રત કરવાનો નિર્દેશ આપવામાં આવ્યો હતો જ્યાં અપર્યાપ્ત તપાસ અને સ્કિનિંગ પ્રક્રિયાઓને કારણે મુસાફરી પર સંપૂર્ણ અથવા આંશિક પ્રતિબંધ મૂકવો જોઈએ.

અમેરિકાની રાષ્ટ્રીય સુરક્ષાને મજબૂત બનાવવા માટે ટ્રમ્પ દ્વારા આ પગલું ભરવામાં આવી શકે છે, જો કે હજુ સુધી ૪૧ દેશોની યાદીને ફાઈનલ ચટ નથી અપાયો અને તેમાં ફેરફાર થવાની શક્યતા રહેલી છે. આ યાદીને હજુ અમેરિકાના વિદેશમંત્રી માર્કો રૂબિયોની સહમતિની સાથે વહીવટી મંજુરીની જરૂર પડશે.આ પ્રસ્તાવિત પ્રતિબંધની સૌથી મોટી અસર ભારતના પડોશી ખાસ કરીને પાકિસ્તાન અને અફઘા-નિસ્તાન પર પડી શકે છે.

સૂત્રોના જણાવ્યા અનુસાર અફઘાનિસ્તાનને સંપૂર્ણ મુસાફરી પ્રતિબંધની યાદીમાં સામેલ કરવામાં આવી શકે છે, જ્યારે પાકિસ્તાનને પણ આ યાદીમાં સામેલ કરવાની ભલામણ કરવામાં આવી છે. આનાથી આવા દેશોના નાગરિકો માટે અમેરિકામાં પ્રવેશ કરવો મુશ્કેલ બની શકે છે. તેનાથી અફઘાનિસ્તાનના શરણાર્થીઓ અને સ્પેશિયલ ઈમિગ્રન્ટ વિઝા (એસ-આઈવી) ધારકો પર મોટી અસર પડી શકે છે જે તાલિબાન સત્તામાં આવ્યા પછી અમેરિકા પહોંચ્યા હતાં.

જો કે, એવી પણ ચર્ચા છે કે અમેરિકાનો વિદેશ મંત્રાલય એસઆઈવી ધારકોને પ્રતિબંધમાંથી મુક્તિ આપવાનો પ્રયાસ કરી રહ્યું છે.

જો આપને આ પોસ્ટ ગમી હોય તો શેર કરો...