અરજદારની બેદરકારીથી વ્યાજમાફી મળી નથીઃ ગ્રાહક ફોરમનો આદેશ

Author: નોબત સમાચાર

અરજદારની બેદરકારીથી વ્યાજમાફી મળી નથીઃ ગ્રાહક ફોરમનો આદેશ

બીઓબી સામે કરાઈ હતી ફરિયાદઃ

જામનગર તા.રપ : જામનગરના એક આસામીએ સરકારના નિયમ મુજબ વ્યાજ માફીનો લાભ મળ્યો ન હોવાની રાવ સાથે બેંક ઓફ બરોડા સામે ગ્રાહક ફોરમમાં ફરિયાદ કરી હતી. ફરિયાદીની બેદરકારી હોવાથી તેઓને વ્યાજ માફી મળી નથી તેવી દલીલ કરાતા ફોરમે ફરિયાદ રદદ્દ કરવાનો હુકમ કર્યાે છે.

જામનગરના મહેશભાઈ વલ્લભભાઈ દુધાગરા નામના આસામીએ બેંક ઓફ બરોડા પાસેથી ગઈ તા.૧૧-૫-૨૩ના દિને કેસીસી લોન મેળવી હતી. તે લોન એક વર્ષમાં ભરપાઈ કરાય તો ખેડૂતને તેના પરનું વ્યાજ માફી આપવું તેવો હુકમ અમલમાં હતો.

તે પછી મહેશભાઈએ તા.૧૩-૫-૨૪ના દિને રૂ.૩ લાખ જમા કરાવ્યા હતા. તેથી તેઓને સરકારના નિયમ મુજબ રૂ.૨૧ હજારની રકમ વ્યાજ માફી પેટે મળવાપાત્ર હતી. તે રકમ ન મળતા મહેશભાઈએ ગ્રાહક તકરાર નિવારણ ફોરમમાં બેંક સામે ફરિયાદ નોંધાવી હતી.

તે ફરિયાદ ચાલવા પર આવતા બેંક દ્વારા દલીલ કરાઈ હતી કે, શનિ તથા રવિવારની રજા હોવાથી આ રકમ બે દિવસ મોડી જમા કરાવાઈ છે. તેથી વ્યાજ માફીનો લાભ મળ્યો નથી. ફોરમે અરજદારની બેદરકારી હોવાથી તેઓને વ્યાજ માફીનો લાભ ન મળી શકે તેમ ઠરાવી ફરિયાદ રદ્દ કરવાનો હુકમ કર્યાે છે. બેંક તરફથી વકીલ નરેન્દ્રસિંહ જેઠવા રોકાયા હતા.

જો આપને આ પોસ્ટ ગમી હોય તો શેર કરો...