મનગમતા પાત્ર સાથે સગાઈ કરી ન અપાતા યુવતીએ કર્યા ઝેરના પારખા

Author: નોબત સમાચાર

મનગમતા પાત્ર સાથે સગાઈ કરી ન અપાતા યુવતીએ કર્યા ઝેરના પારખા

ટૂંકી સારવારના અંતે મૃત્યુ નિપજતા અરેરાટીઃ

જામનગર તા. ૨૫: જામજોધપુરમાં એક ખેતરમાં મજૂરીકામ માટે આવીને રહેતા ઉપલેટાના વતની કોળી પરિવારની સાડા અઢાર વર્ષની પુત્રીએ પોતાના મનગમતા પાત્ર સાથે સગાઈ કરી આપવાનો પરિવારે ઈન્કાર કરતા ઝેરના પારખા કર્યા હતા. તેણીનું ટૂંકી સારવાર પછી મૃત્યુ નિપજ્યું છે. પોલીસે પિતાનું નિવેદન નોંધ્યું છે.

જામજોધપુરમાં કળશીધાર પાસે જીવણભાઈ સંતોકી નામના ખેડૂતના ખેતરમાં મજૂરી કામ માટે રાજકોટ જિલ્લાના ઉપલેટા તાલુકાના નાગવદર ગામના રમેશભાઈ નાથાભાઈ મકવાણા નામના પ્રૌઢની પુત્રી મિતલબેને ગઈકાલે બપોરે કોઈ ઝેરી દવા ગટગટાવી લીધી હતી. તેની જાણ થતાં આ યુવતીને સારવાર માટે દવાખાને ખસેડવામાં આવી હતી. જ્યાં ટૂંકી સારવાર પછી મિતલબેનનું મૃત્યુ નિપજ્યું છે.

આ બનાવની પિતા રમેશભાઈ મકવાણાએ પોલીસને જાણ કરી છે. પોલીસે મૃતદેહને પી.એમ. માટે ખસેડી પિતાનું નિવેદન નોંધ્યું છે. જેમાં તેઓએ જણાવ્યા મુજબ સાડા અઢારેક વર્ષની વયની તેમની પુત્રી મિતલબેને થોડા સમય પહેલાં પોતાના પસંદગીના પાત્ર સાથે સગાઈ કરી આપવા માટે ઘરમાં વાત કરી હતી. આ વેળાએ પરિવારજનોએ ત્યાં સગાઈ કરી આપવાની ના પાડી હતી. તેથી મિતલબેનને માઠું લાગી આવ્યું હતું. તે પછી ગઈકાલે આ યુવતીએ ઝેરના પારખા કર્યા છે. પોલીસે નિવેદન પરથી અપમૃત્યુ અંગે નોંધ કરી તપાસ હાથ ધરી છે.

જો આપને આ પોસ્ટ ગમી હોય તો શેર કરો...