બાલંભાના માછીમારની બે બોટ ચોરી સળગાવી નાખવાના આરોપીની ધરપકડ

Author: નોબત સમાચાર

બાલંભાના માછીમારની બે બોટ ચોરી સળગાવી નાખવાના આરોપીની ધરપકડ

ધંધાખારના કારણે બોટ સળગાવ્યાની કબૂલાતઃ

જામનગર તા.૩ : જોડિયાના બાલંભા ગામના એક માછીમારની બે બોટ ચોરાઈ ગયાની પોલીસમાં ફરિયાદ કરાયા પછી આરંભાયેલી તપાસમાં બાલંભા ગામનો જ એક શખ્સ ઝડપાયો છે. તેણે ધંધાખારના કારણે બંને બોટ છોડાવી દરિયામાં લઈ જઈ સળગાવ્યાની કબૂલાત આપી છે. પોલીસે સળગેલી એક બોટ કબજે કરી બીજી બોટની શોધખોળ આરંભી છે અને આરોપીને રિમાન્ડ પર લીધો છે.

જોડિયા તાલુકાના બાલંભા ગામના સલીમ મુસાભાઈ ચાવડા નામના માછીમારે પોતાની કિસ્મત તથા પીરાણી નામની બે બોટ જ્યાં લાંગરેલી હતી ત્યાંથી ગુમ થઈ જતાં પોતાની બે બોટની ચોરી થયાની બેડી મરીન પોલીસ સ્ટેશનમાં ફરિયાદ નોંધાવી હતી. પોલીસે ગુન્હો નોંધી તપાસ હાથ ધરી હતી.

તે દરમિયાન એલસીબી પીઆઈ વી.એમ. લગારીયા, એસઓજી પીઆઈ બી.એન. ચૌધરી તથા બેડી મરીન પોલીસ સ્ટેશનના પીએસઆઈ વી.એસ. પોપટ દ્વારા સંયુક્ત ટીમ બનાવી તપાસ કરાતા બાલંભા ગામના અસગર અલારખા ચાવડા નામના એક શખ્સે તે બોટ ચોરી કરી હોવાનું જાણવા મળ્યું હતું.

તે પછી અસગર ચાવડાને અટકાયતમાં લઈ પૂછપરછ કરાતા તેણે આ બંને બોટ જ્યાં લાંગરેલી હતી ત્યાંથી છોડાવી દરિયામાં લઈ જઈ બાલંભા નજીકની દરિયાઈ ખાડીમાં સુઈનેસ પાસે જવલનશીલ પ્રવાહી છાંટી બંને બોટને સળગાવ્યાની વિગત ઓકી નાખી હતી. પોલીસ ટીમે તે સ્થળે જઈ તપાસ કરતા એક બોટ અર્ધ સળગેલી હાલતમાં મળી આવી છે. પોલીસ બીજી બોટની તપાસ ચલાવી રહી છે. અસગર ચાવડાની ધરપકડ કરી રિમાન્ડ માટે કોર્ટમાં રજૂ કરાતા અદાલતે તેના રિમાન્ડ મંજૂર રાખ્યા છે.

જો આપને આ પોસ્ટ ગમી હોય તો શેર કરો...