કલ્પેશ આસાણીએ કોન્ટ્રાક્ટરને ગાળો ભાંડી ધમકી આપ્યાની પોલીસમાં ફરિયાદ

Author: નોબત સમાચાર

કલ્પેશ આસાણીએ કોન્ટ્રાક્ટરને ગાળો ભાંડી ધમકી આપ્યાની પોલીસમાં ફરિયાદ

વીજ કંપનીના ઈજારેદારની વળતી રાવઃ

જામનગર તા.૧૨ : જામનગરના બેડીમાં રહેતા પીજીવીસીએલના કોન્ટ્રાક્ટર સામે એક આરટીઆઈ એક્ટિવીસ્ટે ધમકી આપ્યાની ફરિયાદ કર્યા પછી સામાપક્ષે પણ વળતી ફરિયાદ નોંધાવી છે. તેમાં જણાવાયા મુજબ આ શખ્સે વીજ કંપનીમાં ખોટી અરજી કર્યા પછી ગાળો ભાંડી પતાવી દેવાની ધમકી આપી હતી.

જામનગરના બેડી વિસ્તાર માં રહેતા અને પીજીવીસી એલમાં કોન્ટ્રાક્ટર તરીકે કામ કરતા અનવર ઈસ્માઈલભાઈ કુંગડા નામના આસામીએ જામનગરની કામદારકોલોનીમાં મયુર સાગર એપાર્ટમેન્ટમાં રહેતા કલ્પેશ વિનોદરાય આસાણી નામના શખ્સ સામે સિટી બી ડિવિઝન પોલીસ સ્ટેશનમાં ફરિયાદ નોંધાવી છે.

આ વળતી ફરિયાદમાં કોન્ટ્રાક્ટરે જણાવ્યું છે કે, તેઓ પીજીવીસીએલના વાલસુરા ફીડરમાં અન્ડરગ્રાઉન્ડ કેબલનું હાલમાં કામ કરી રહ્યા છે. ગઈ તા.૬એ કલ્પેશ આસાણીએ જામનગર પીજીવીસીએલની લાલબંગલા પાસેની કચેરીએ આવી અધિક્ષક ઈજનેર તથા વિભાગીય કાર્યપાલક ઈજનેર (શહેર)ને ખોટી અરજી પાઠવી હતી. જેમાં તેણે જણાવ્યું હતું કે, ૧૧ કેવી વાલસુરા ફીડરમાં ચાલી રહેલુ કામ વર્કઓર્ડરની શરત અને જોગવાઈ મુજબ કોન્ટ્રાક્ટર દ્વારા થતું નથી.

આ બાબતે કલ્પેશ સાથે વાત કરાતા તેણે હેરાન પરેશાન કરી નાખવાની ધમકી આપી ગાળો ભાંડ્યા પછી પતાવી દેવાની ધમકી પણ આપી હતી. આરટીઆઈ એક્ટિવીસ્ટ ગણાતા કલ્પેશ આસાણી સામે બીએનએસની કલમ ૩૫૧ (૩) , ૩૫૨ હેઠળ ગુન્હો નોંધી તપાસ શરૂ કરી છે.

ઉલ્લેખનીય છે કે, કલ્પેશ આસાણીએ પીજીવીસીએલના કોન્ટ્રાક્ટર અનવરભાઈ સામે ફોન તથા રૂબરૂ મળી ગાળો ભાંડી ધમકી આપ્યાની ફરિયાદ કર્યા પછી ગઈકાલે તેની સામે કોન્ટ્રાક્ટરે ફરિયાદ કરી છે.

જો આપને આ પોસ્ટ ગમી હોય તો શેર કરો...