ઝારખંડમાં વાવાઝોડા સાથે વરસાદે સર્જી તારાજીઃ ૭ ના મૃત્યુઃ અનેકને ઈજા

Author: નોબત સમાચાર

ઝારખંડમાં વાવાઝોડા સાથે વરસાદે સર્જી તારાજીઃ ૭ ના મૃત્યુઃ અનેકને ઈજા

રાંચી તા.૮: રાંચી સહિત ઝારખંડમાં ભારે વરસાદ અને વાવાઝોડાએ તારાજી સર્જી છે. ૭ ના મૃત્યુ થયા છે. જ્યારે અનેક લોકો ઘાયલ થયા છે. અનેક વિસ્તારોમાં અંધારપટ છવાયો છે.

ઝારખંડના રાંચી સહિત ઘા સ્થળે આંધી સાથે વરસાદ થયો છે, ઘણા સ્થળોએ કરા પડ્યા અને વજ્રપાત થયો. સમગ્ર ઝારખંડમાં મંગળવારે સાંજે અચાનક હવામાનમાં પલટો આવ્યો. આ દરમ્યાન આંધી સાથે વરસાદ ખાબક્યો. વાવાઝોડા વરસાદ અને કરા સાથે ઘણા વિસ્તારમાં જોરદાર તબાહી મચાવી. ઝાડ પડવા અને વજ્રપાતાના લીધે ૭ લોકોના મૃત્યુ થયા છે. જ્યારે અનેક લોકોને ઈજા પહોંચી છે. રાંચી, પલામૂ અને ધનબાદમાં બે-બે લોકોના મૃત્યુ થયા છે. જ્યારે કોડરમામાં એક વ્યક્તિનું મૃત્યુ નિપજ્યું છે.

હવામાન વિભાગે આગામી ચાર દિવસ સુધી ભારે પવન અને વજ્રપાતનું યલો એલર્ટ જાહેર કર્યું છે. હવામાન વૈજ્ઞાનિકોના અનુસાર મધ્યપ્રદેશના ઉઠેલા ચક્રવાત અને ઓડિશા અને ઝારખંડથી પસાર થવાના કારણે હવામાનમાં ફેરફાર આવ્યો છે. વાવાઝોડા અને વરસાદના કારણે મહત્તમ તાપમાનમાં સાત ડિગ્રીનો ઘટાડો થયો છે. પૂર્વ સિંધભૂમિના બહારગોરામાં સૌથી વધુ ૧૭.૬ મીમી વરસાદ નોંધાયો હતો. જ્યારે પલામુમાં ધૂળની ડમરીઓ અને ઝરમર વરસાદ થયો હતો, તો ગઢવામાં સાંજ ૪ વાગ્યાની આસપાસ જોરદાર તોફાનો સાથે વરસાદ અને કરા પડ્યા હતા. કરા પડતા શાકભાજીના પાકને ઘણું નુકસાન થયું છે.

મંગળવારે સાંજે આંધીના કારણે વીજળી કટ થઈ ગઈ છે. આંધી શરૂ થયા બાદ સુરક્ષાત્મક કારણોના લીધે શહેરમાં ૧૧ કેવીના ૧૬૦ ફીડરોમાંથી વીજળીનો પુરવઠો બંધ કરી દેવામાં આવ્યો હતો. લગભગ બે કલાક સુધીમાં રાંચીમાં વીજળીનો પુરવઠો ઠપ્પ રહ્યો હતો. સૌથી વધુ પરેશાની કોકર વિસ્તારમાં સર્જાઈ હતી. અહીં ઘણાં વિસ્તારોમાં ૪ કલાક સુધી વીજળી ગુલ રહી હતી.

જો આપને આ પોસ્ટ ગમી હોય તો શેર કરો...