મતદાન પૂર્ણ થયા પછી ચાંદીબજારમાંં કોંગી કાર્યકર પર હુમલો થતાં મચ્યો ખળભળાટ

Author: નોબત સમાચાર

મતદાન પૂર્ણ થયા પછી ચાંદીબજારમાંં કોંગી કાર્યકર પર હુમલો થતાં મચ્યો ખળભળાટ

કોંગ્રેસના ઉમેદવાર સહિતના અગ્રણીઓ હોસ્પિટલ દોડ્યાઃ ફરિયાદ માટે તજવીજઃ

જામનગર તા. ૮: જામનગરના ચાંદીબજાર વિસ્તારમાં ગઈકાલે સાંજે કોંગ્રેસના એક કાર્યકર પર હુમલો કરાયો હતો. ગઈકાલે મતદાન પ્રક્રિયા ચાલુ હતી ત્યારે એક બુથ પર આ કાર્યકરને અન્ય પક્ષના કાર્યકર સાથે કોઈ બાબતે ઘર્ષણ થયા પછી મતદાન પૂર્ણ થતાં જ આ યુવાનને માર મારવામાં આવતા ખળભળાટ મચ્યો છે. ઈજાગ્રસ્તને હોસ્પિટલ ખસેડવામાં આવ્યા છે. જ્યાં ઉમેદવાર સહિતના કોંગ્રેસી અગ્રણીઓ દોડી ગયા હતા. આ બાબતની ફરિયાદ માટે તજવીજ કરાઈ રહી છે.

જામનગરના મહાલક્ષ્મી ચોક વિસ્તારમાં રહેતા અને જામનગરના વોર્ડ નં.૯ના કોંગ્રેસના વોર્ડ પ્રમુખ તરીકે સેવા આપતા પિયુષભાઈ પરમાર ઉર્ફે મુન્નાભાઈ નામના કાર્યકર પર ગઈકાલે સાંજે છ વાગ્યે લોકસભાની સામાન્ય ચૂંટણીનું મતદાન પૂર્ણ થયા પછી કેટલાક વ્યક્તિએ ચાંદી બજારમાં હુમલો કર્યાે હતો.

હુમલામાં ઈજા પામેલા પિયુષભાઈને સારવાર માટે જી.જી. હોસ્પિટલમાં ખસેડવામાં આવ્યા છે. કાર્યકર પર હુમલો થયાની જાણ થતાં લોકસભાની જામનગર સીટના કોંગ્રેસના ઉમેદવાર જે.પી. મારવીયા તેમજ જામનગર શહેર કોંગ્રેસ પ્રમુખ દિગુભા જાડેજા, નગરસેવક ધવલ નંદા સહિતના કોંગી અગ્રણીઓ હોસ્પિટલ દોડી ગયા હતા.

આ યુવાનને ગઈકાલે જ્યારે મતદાન ચાલુ હતું ત્યારે કોઈ બાબતે અન્ય પક્ષના કાર્યકરો સાથે જીભાજોડી થયા પછી મતદાન પૂર્ણ થતાં જ હુમલો થયાનું જાણવા મળી રહ્યું છે. તબીબોએ પિયુષભાઈની તબીયત ભયમુક્ત જણાવી છે.

કેટલાક દિવસોથી મતદાનની તારીખ જાહેર થયા પછી બે મુખ્ય પક્ષ સહિતના ઉમેદવારો દ્વારા પુરજોશમાં પ્રચાર કરવામાં આવી રહ્યો હતો. તે પછી ગઈકાલે મતદાન પ્રક્રિયા હાથ ધરાઈ હતી. જેમાં એક બુથ પર કોંગ્રેસી કાર્યકર પિયુષભાઈને અન્ય વ્યક્તિ સાથે ઘર્ષણ થતાં તત્કાળ પુરતો મામલો થાળે પડ્યો હતો પરંતુ તે પછી જેવું મતદાન પૂર્ણ થયું તે પછી તરત જ આ કાર્યકર પર હુમલો થતાં રાજકીય રીતે પણ ખળભળાટ મચ્યો છે. આ બાબતની પોલીસમાં ફરિયાદ કરવા માટે તજવીજ કરવામાં આવી છે.

જો આપને આ પોસ્ટ ગમી હોય તો શેર કરો...