સ્મશાન પાસે મકાનમાંથી મળી દારૂની ૫૯ બોટલઃ આરોપીએ બે ના નામ આપ્યા

Author: નોબત સમાચાર

સ્મશાન પાસે મકાનમાંથી મળી દારૂની ૫૯ બોટલઃ આરોપીએ બે ના નામ આપ્યા

પવનચક્કી, ખીજડિયા બાયપાસ પાસેથી નવ બોટલ ઝબ્બેઃ

જામનગર તા. ૧૫: જામનગરના નાગેશ્વર રોડ પર સ્મશાન નજીક એક મકાનમાં એલસીબીએ દરોડો પાડી ૫૯ બોટલ ઈંગ્લીશ દારૂ કબજે કરી છે. ઝડપાયેલા શખ્સે અન્ય બેના નામ આપ્યા છે. પવનચક્કી પાસેથી ચાર બોટલ સાથે એક તથા ખીજડિયા બાયપાસ પાસેથી પાંચ બોટલ સાથે એક શખ્સ મળી આવ્યો છે. દિગ્વિજય પ્લોટ-૫૦ પાસેથી દારૂની બોટલ સાથે જતા એક શખ્સની અટકાયત કરાઈ છે.

જામનગરના નાગેશ્વર રોડ પર આવેલા સ્મશાન નજીક એક મકાનમાં દારૂનો જથ્થો પડ્યો હોવાની બાતમી એલસીબીના ક્રિપાલસિંહ, કિશોર પરમારને મળતા પીઆઈ વી.એમ. લગારીયાને વાકેફ કરાયા પછી પીએસઆઈ પી.એન. મોરી, એ.કે. પટેલ તથા સ્ટાફે ત્યાં આવેલા દિવ્યરાજસિંહ જીતુભા પરમાર નામના શખ્સના મકાનમાં દરોડો પડાયો હતો.

તે મકાનની તલાશી લેવાતા ત્યાંથી અંગ્રેજી શરાબની ૫૯ બોટલ મળી આવી હતી. એલસીબીએ બોટલ, મોબાઈલ સહિત રૂા.૨૮૬૦૦નો મુદ્દામાલ કબજે કર્યાે છે. આ આરોપીએ પોતાના સાગરિત મહેશ્વરીવાસમાં રહેતા નીતિન દેવશીભાઈ પરમાર તથા સ્મશાન નજીક રહેતા લાલજી મનસુખભાઈ મકવાણાનું નામ આપ્યું છે.

જામનગરના પવનચક્કી સર્કલથી જિલ્લા જેલ તરફ જવાના રોડ પર ગઈકાલે સાંજે પસાર થતાં હર્ષદ મીલની ચાલી નજીક રહેતા વિજય ઘેલાભાઈ સીંગરખીયા નામના શખ્સને રોકી પેટ્રોલિંગમાં રહેલા સિટી એ ડિવિઝનના સ્ટાફે ચેક કરતા તેના કબજામાંથી દારૂની ચાર બોટલ મળી આવી હતી.

જામનગરના દિગ્વિજય પ્લોટ વિસ્તારની શેરી નં.૫૦ પાસેથી મિલન જયંતિલાલ જોઈસર ઉર્ફે બતક નામનો શખ્સ દારૂની બોટલ સાથે ઝડપાઈ ગયો છે.

જામનગર-રાજકોટ રોડ પર આવેલા ખીજડિયા બાયપાસ નજીકથી ગઈકાલે બપોરે જઈ રહેલા અમરેલી જિલ્લાના સાવરકુંડલામાં રહેતા અશોક શિવાભાઈ સોલંકી નામના શખ્સને પોલીસે દારૂની પાંચ બોટલ સાથે પકડી પાડ્યો છે.

જો આપને આ પોસ્ટ ગમી હોય તો શેર કરો...