જામનગરમાં સાત રસ્તાથી ગુરૂદ્વારાનો રસ્તો દોઢ મહિના માટે સદંતર બંધ કરાયો

Author: નોબત સમાચાર

જામનગરમાં સાત રસ્તાથી ગુરૂદ્વારાનો રસ્તો દોઢ મહિના માટે સદંતર બંધ કરાયો

તમામ પ્રકારના વાહનો માટે વૈકલ્પિક માર્ગો સૂચવયાઃ

જામનગર તા. ૧પઃ જામનગર મહાનગરપાલિકાના કમિશનર દ્વારા જાહેરનામું પ્રસિદ્ધ કરાયું છે, તદ્નુસાર જામનગરના સાત રસ્તાથી ગુરુદ્વારા સુધીનો માર્ગ દોઢ માસ માટે તમામ પ્રકારના વાહનવ્યવહાર માટે બંધ કરાયો છે.

જામનગર મહાનગર પાલિકાના કમિશનર ડી.એન. મોદીએ એક જાહેરનામું પ્રસિદ્ધ કરીને સાત રસ્તાથી ગુરુદ્વારા સુધીનો માર્ગ તમામ પ્રકારના વાહનવ્યવહાર માટે બંધ કરવા આદેશ કર્યો છે. સાત રસ્તાથી સુભાષ બ્રીજ સુધીના માર્ગ પર ફોર લેન એલીવેટેડ ફ્લાય ઓવર બ્રીજ બનાવાની કામગીરી અંતર્ગત લેફ્ટ અને રાઈટ સાઈડના બ્રીજ સ્થાનને સેન્ટરના ફોરલેન બ્રીજ સાથેની કનેક્ટિવિટીની કામગીરી અનુસંધાને સાત રસ્તા સર્કલથી ગુરુદ્વારા જંકશન સુધીનો રોડ સલામતીના ભાગરૂપે તેમજ અકસ્માત નિવારવના હેતુથી તા. ૧પ-૧૧-ર૦ર૪ થી ૩૦-૧ર-ર૦ર૪ સુધીના સમયગાળા દરમિયાન તમામ વાહન વ્યવહાર ડાયવર્ટ કરવા જાહેર નોટીસ બહાર પાડવામાં આવી છે, જેનો અમલ કરવાનો હુકમ કમિશનર દ્વારા કરવામાં આવ્યો છે.

જે કોઈ વ્યક્તિ આ હુકમનો ભંગ કરશે તેની સામે નિયમ અનુસાર દંડની કાર્યવાહી કરવામાં આવશે. ટુ વ્હીલર તથા તમામ પ્રકારના નાના વાહનો માટેની વૈકલ્પિક વ્યવસ્થા કરવામાં આવી છે, જેમાં સાત રસ્તા સર્કલ તરફથી ગુરુદ્વારા જંકશન તરફ જવાનો મુખ્ય માર્ગ બંધ રહેશે, જેની વૈકલ્પિક વ્યવસ્થા માટે વાલ્કેશ્વરીનગરી આદર્શ હોસ્પિટલવાળા રોડથી વાલ્કેશ્વરી ફેઈસ-ર અને ફેઈઝ-૩ ના તમામ રસ્તાઓ, મંગલબાગ અને સ્વસ્તિક સોસાયટીથી જી.જી. હોસ્પિટલ તરફનો રોડ તથા વાલ્કેશ્વરીનગરી ફેઈઝ-૩ નંદ ટ્રાવેલ્સ તરફના રસ્તાઓ ખુલ્લા રહેશે. આમ સાત રસ્તાથી ગુરુદ્વારા તરફ જતા વાલ્કેશ્વરીનગરના તમામ આંતરિક રસ્તાઓનો ઉપયોગ ચાલુ રહેશે.

ગુરુદ્વારા જંકશન તરફથી સાત રસ્તા સર્કલ તરફ જવાનો મુખ્ય માર્ગ બંધ રહેશે. જેની વૈકલ્પિક વ્યવસ્થા માટે ગુરુદ્વારા જંકશનથી લાલબંગલા સર્કલ થઈ સાત રસ્તા સર્કલ તરફનો માર્ગ ખુલ્લો રહેશે. તેમજ ગુરુદ્વારા જંકશનથી વાલ્કેશ્વરીનગરી ફેઈઝ-ર અને ફેઈઝ-૩ મેઈન રોડ સુધીનો રસ્તો પણ ખુલ્લો રહેશે.

જ્યારે ભારે વાહનો માટેની વૈકલ્પિક વ્યવસ્થામાં સાત રસ્તા સર્કલથી લાલબંગલો સર્કલ જઈ ટાઉનહોલ થઈ તીનબત્તી સર્કલ થઈ કે.વી. રોડ પરથી સુભાષબ્રીજ પર જઈ શકાશે. સુભાષબ્રીજથી ત્રણ દરવાજા સર્કલ થઈ ટાઉનહોલ થઈ લાલબંગલા સર્કલ થઈ સાત રસ્તા સર્કલ જઈ શકાશે.

જો આપને આ પોસ્ટ ગમી હોય તો શેર કરો...