કોમન પ્લોટમાં દબાણ કરવાના કેસમાં આરોપીની ડિફોલ્ટ બેઈલ અરજી કરાઈ રદ્દ

Author: નોબત સમાચાર

કોમન પ્લોટમાં દબાણ કરવાના કેસમાં આરોપીની ડિફોલ્ટ બેઈલ અરજી કરાઈ રદ્દ

ધર્મેશ રાણપરીયાએ કરેલી અરજી અદાલતે નકારીઃ

જામનગર તા.૩ : જામનગરના મયુર ટાઉનશીપ વિસ્તારમાં કોમન પ્લોટમાં દબાણ કરી લેવા અંગે એક શખ્સ સામે ફરિયાદ કરાયા પછી તે ફરિયાદ રદ્દ કરાવવા સુપ્રિમ કોર્ટ સુધી કાનૂની લડત કરાઈ હતી. સુપ્રિમ કોર્ટે તા.૧૭ માર્ચ સુધીનો એક હુકમ કર્યાે છે. તે પછી આરોપીએ ડિફોલ્ટ બેઈલ મેળવવા અદાલતમાં અરજી કરી પોલીસે ચાર્જશીટ મોડું કર્યાની દલીલ કરી હતી તેમ છતાં અદાલતે તેની જામીન અરજી નકારી કાઢી છે.

જામનગરના રણજીત સાગર રોડ પર આવેલી મયુર ટાઉનશીપમાં કોમન પ્લોટ ફરતે ધર્મેશ મુળજીભાઈ રાણપરીયા (પટેલ) નામના શખ્સે દબાણ સર્જી કમ્પાઉન્ડ વોલ ઉભી કરી લીધાની અને તેમાં શૌચાલય, શેડ, મકાન ખડક્યાની અરજી કરાયા પછી પોલીસ ફરિયાદની સૂચના અપાતા સિટી એ ડિવિઝનમાં તે અંગેનો ગુન્હો નોંધાયો હતો.

ઉપરોક્ત ફરિયાદ રદ્દ કરાવવા આરોપી ધર્મેશ રાણપરીયા (પટેલ)એ પીટીશન કરી હતી. તેને રદ્દ કરાતા આરોપીએ સુપ્રિમ કોર્ટમાં પીટીશન ફાઈલ કરી હતી. સુપ્રિમ કોર્ટે તા.૧૭ માર્ચ સુધીનો નો-કર્ઝીવ સ્ટેપ્સનો હુકમ કર્યાે હતો.

તે દરમિયાન આરોપી ધર્મેશ રાણપરીયાએ જામનગર સેશન્સ કોર્ટમાં રેગ્યુલર જામીન અરજી કરી હતી. તે પણ રદ્દ કરાઈ હતી. આ આરોપીએ પોલીસે સમય મર્યાદા પછી ચાર્જશીટ કર્યું છે. તેમ જણાવી અદાલતમાં જામીન અરજી રજૂ કરી હતી. તેની સુનાવણી વખતે મદદનીશ જિલ્લા સરકારી વકીલ પિયુષ પરમારે દલીલ કરી હતી કે, આરોપીએ સુપ્રિમ કોર્ટમાં પીટીશન ફાઈલ કરી છે અને એફઆઈઆર અંગેનો ઓર્ડર અદાલતમાંથી મેળવ્યો છે, નવો હુકમ ન આવે ત્યાં સુધી યથાવત પરિસ્થિતિ જાળવી રાખવાનો હુકમ છે. તેમજ આરોપીના પત્ની મેઘનાબેન ધર્મેશભાઈએ તેની જાણ તા.૧૭ના દિને સિટી એ ડિવિઝન પોલીસને લેખિતમાં કરી છે. તેથી સુપ્રિમ કોર્ટના હુકમથી પોલીસે ચાર્જશીટ ફાઈલ કર્યું ન હતું. અદાલતે તે દલીલ ગ્રાહ્ય રાખી આરોપીની જામીન અરજી રદ્દ કરી છે.

જો આપને આ પોસ્ટ ગમી હોય તો શેર કરો...