મોટી બાણુંગાર ગામના પાટીયા પાસે ટેન્કર પાછળ ટ્રક ટકરાતા ચાલકનો પગ ભાંગી ગયા

Author: નોબત સમાચાર

મોટી બાણુંગાર ગામના પાટીયા પાસે ટેન્કર પાછળ ટ્રક ટકરાતા ચાલકનો પગ ભાંગી ગયા

બ્રેક મારી ઉભા રહી ગયેલા ટેન્કરના ચાલક સામે ગુન્હોઃ

જામનગર તા. ૫:જામનગર-રાજકોટ ધોરીમાર્ગ પર મોટી બાણુંગાર ગામના પાટીયા પાસે સપ્તાહ પૂર્વે રાત્રિના સમયે એક ટ્રકને ઓવરટેક કરી આગળ જઈ ટેન્કર ઉભુ રહી ગયું હતું. તેના ઠાઠામાં ટ્રક ટકરાઈ પડતા આ ટ્રકના ચાલકનો પગ ભાંગી ગયો છે. તેના પુત્રએ અકસ્માત સર્જનાર ટેન્કરના ચાલક સામે પોલીસમાં ફરિયાદ નોંધાવી છે.

જામનગર નજીક આવેલા મોટી ખાવડી ગામ સ્થિત રિલાયન્સ કંપનીમાંથી ગઈ તા.ર૬ની રાત્રે મૂળ રાજસ્થાનના ઉદયપુર જિલ્લાના વતની નારાયણલાલ વજયરામ મેનારીયા નામના ટ્રક ડ્રાઈવર આરજે-૨૭-જીઈ ૯૮૫ નંબરના ટ્રકમાં સલ્ફર ભરીને મધ્યપ્રદેશના નાગડા જવા માટે નીકળ્યા હતા.

તેઓ જ્યારે જામનગર-રાજકોટ ધોરીમાર્ગ પર મોટી બાણુંગાર ગામના પાટીયા પાસે પહોંચ્યા ત્યારે પાછળથી ધસી આવેલા અજાણ્યા ટેન્કર ચાલકે ઓવરટેક કરી આગળ જઈ બ્રેક મારતા તેના ઠાઠામાં નારાયણલાલનો ટ્રક ટકરાઈ પડ્યો હતો. આ અકસ્માતમાં નારાયણલાલને પગમાં ફ્રેક્ચર સહિતની ઈજા થઈ છે. આગળ બ્રેક મારીને ઉભુ રહી ગયેલુ ટેન્કર અકસ્માત પછી નાસી છૂટયું છે. નારાયણલાલના પુત્ર દિનેશભાઈએ પંચકોશી એ ડિવિઝન પોલીસ સ્ટેશનમાં ફરિયાદ નોંધાવી છે.

જો આપને આ પોસ્ટ ગમી હોય તો શેર કરો...