ખંભાળીયાના સોનલ ધામમાં ધો. ૧૦-૧૨ની બોર્ડની પરીક્ષાના તેજસ્વી તારલાઓનું સન્માન

Author: નોબત સમાચાર

ખંભાળીયાના સોનલ ધામમાં ધો. ૧૦-૧૨ની બોર્ડની પરીક્ષાના તેજસ્વી તારલાઓનું સન્માન

આઈ શ્રી સોનલમાં એજ્યુકેશન એન્ડ ચેરીટેબલ ટ્રસ્ટ દ્વારા

ખંભાળીયા તા. ૫:ખંભાળીયા સોનલધામમાં ધો. ૧૦-૧૨ના ચારણ-ગઢવી સમાજના તેજસ્વી તારલાઓને સન્માનિત કરાયા હતા. આ પ્રસંગે સોનલધામ મઢડાથી પૂજ્ય ગીરીઆપા અને આઈ હિરલમાં સહિત સમાજ અગ્રણીઓ ઉપસ્થિત રહ્યા હતા.

ખંભાળીયા જડેશ્વર રોડ પર આવેલ સોનલધામમાં આવેલ ચારણ-ગઢવી કુમાર છાત્રાલયમાં દેવભૂમિ દ્વારકા જિલ્લાના ચારણ-ગઢવી સમાજના વર્ષ ૨૦૨૫માં ધો.૧૦ અને ૧૨માં પાસ થયેલ તેજસ્વી તારલાઓનું આઈશ્રી સોનલમાં એજ્યુકેશન એન્ડ ચેરીટેબલ ટ્રસ્ટ દ્વારા ૧ જૂને રવિવારે સાંજે ચાર થી છ દરમ્યાન વિદ્યાર્થીઓને સન્માનિત કરવાના કાર્યક્રમનું આયોજન હાથ ધરવામાં આવ્યું હતું.

આઈ શ્રી પૂજ્ય હિરલમાં તેમજ મઢડાથી પૂજ્ય ગીરીઆપા તેમજ સમાજ અગ્રણીઓની વિશેષ ઉપસ્થિતિમાં શ્રી સોનલમાં એજ્યુકેશન એન્ડ ચેરીટેબલ ટ્રસ્ટ દ્વારા આ તકે ૧૫૦ જેટલા ધો. ૧૦-૧૨માં પાસ થયેલા ચારણ-ગઢવી સમાજના તેજસ્વી ભાઈઓ-બહેનોને હિરલ માતાજી, ગીરીઆપા તેમજ ટ્રસ્ટીઓ અને સમાજ અગ્રણીઓના હસ્તે પ્રમાણપત્રો આપી પ્રોત્સાહિત કરવામાં આવ્યા હતા.

દ્વારકા જિલ્લામાં ચારણ ગઢવી સમાજમાંથી જે વિદ્યાર્થીઓ ધો. ૧૦-૧૨માં પ્રથમ દ્વિતીય અને તૃતીય આવેલ તેને વિશિષ્ટ પુરસ્કાર આપીને સન્માનિત કરવામાં આવ્યા હતા. આ તકે ટ્રસ્ટ દ્વારા માહિતી અને માર્ગદર્શન આપવામાં આવ્યું હતુ. આ કાર્યક્રમમાં મોટી સંખ્યામાં વિદ્યાર્થીઓ સાથે વાલીઓ અને સમાજ અગ્રણીઓ ઉપસ્થિત રહ્યા હતા.

જો આપને આ પોસ્ટ ગમી હોય તો શેર કરો...