પાકિસ્તાનના પૂર્વ પી.એમ. ઈમરાનખાન અને બુશરાબીબીને ભ્રષ્ટાચારના કેસમાં ૧૭ વર્ષની સજા

Author: નોબત સમાચાર

પાકિસ્તાનના પૂર્વ પી.એમ. ઈમરાનખાન અને બુશરાબીબીને ભ્રષ્ટાચારના કેસમાં ૧૭ વર્ષની સજા

ફેડરલ ઈન્વેસ્ટિગેશન એજન્સીની વિશેષ કોર્ટે આપ્યો ઝટકો

ઈસ્લામાબાદ તા. ૨૦: પાકિસ્તાનના પૂર્વ પી.એમ. ઈમરાન ખાન અને તેના પત્ની બુશરા બીબીને ૧૭ વર્ષની સજા થઈ છે, ભ્રષ્ટાચારના કેસમાં પાકિસ્તાની કોર્ટનો ચુકાદો આવતા ખાન દંપતીને ઝટકો લાગ્યો છે.

પાકિસ્તાનમાં ભ્રષ્ટાચારના એક કેસમાં પૂર્વ વડાપ્રધાન ઈમરાન ખાન અને તેમની પત્ની બુશરા બીબીને મોટો ઝટકો લાગે તેવો ચુકાદો આવ્યો છે. ફેડરલ ઈન્વેસ્ટિગેશન એજન્સી (એફઆઈએ)ની વિશેષ કોર્ટે તોશાખાના-૨ ભ્રષ્ટાચાર કેસમાં બંનેને ૧૭-૧૭ વર્ષની સજા ફટકારી છે.

કોર્ટે ઈમરાન ખાન અને બુશરા બીબીને આ મામલે દોષિત ઠેરવતા સજાની જાહેરાત કરી હતી.

સ્થાનિક મીડિયાના અહેવાલ પ્રમાણે આ મામલો ૨૦૨૧ નો છે જ્યારે સાઉદી અરબના રાજકુમાર ઈમરાન ખાનને એક કિંમતી બુલ્ગારી જ્વલેરી સેટ ભેટમાં આપી ગયા હતા. તપાસમાં જાણવા મળ્યું કે આ ઘરેણાની વાસ્તવિક કિંમત ૭ કરોડ ૧૫ લાખ પાકિસ્તાની રૂપિયા કરતા વધારે હતી પણ તેને ફક્ત ૫૮ લાખ રૂપિયામાં ખરીદી નિયમોનું ઉલ્લંઘન કરાયું. કોર્ટે તેને સરકારી વિશ્વાસ સાથે દગો અને ભ્રષ્ટાચાર ગણાવ્યો હતો.

કોર્ટના ચુકાદા મુજબ ઈમરાન ખાનને ગુનાહિત વિશ્વાસઘાત હેઠળ ૧૦ વર્ષ અને ભ્રષ્ટાચાર નિવારણ કાયદા હેઠળ ૭ વર્ષની સજા ફટકારવામાં આવી છે.

બુશરા બીબીને સમાન ધારાઓમાં કુલ ૧૭ વર્ષની સજા આપી છે. આ ઉપરાંત બંને પર ૧ કરોડ ૬૪ લાખ રૂપિયાનો દંડ પણ ફટકાર્યો છે. દંડ ન ચૂકવવાની સ્થિતિમાં વધારાની જેલની સજા પણ ભોગવવી પડશે.

જો આપને આ પોસ્ટ ગમી હોય તો શેર કરો...