મહાકુંભના ૧૪ શ્રદ્ધાળુઓના બે અલગ-અલગ અકસ્માતોમાં કરૂણ મૃત્યુઃ અરેરાટી

Author: નોબત સમાચાર

મહાકુંભના ૧૪ શ્રદ્ધાળુઓના બે અલગ-અલગ અકસ્માતોમાં કરૂણ મૃત્યુઃ અરેરાટી

પ્રયાગરાજ તરફ જતા ૧૦ અને વતન તરફ પરત ફરતા ૪ શ્રદ્ધાળુઓને કાળ આંબી ગયોઃ

નવી દિલ્હી તા. ૧૫: પ્રયાગરાજમાં યોજાયેલા મહાકુંભમાં ગંગાસ્નાન માટે જતા અને આવતા થયેલા બે અલગ અલગ અકસ્માતોમાં ૧૪ શ્રદ્ધાળુઓના કરૂણ મૃત્યુ થતા અરેરાટી ફેલાવા પામી છે.

પ્રાપ્ત થતી વિગતો મુજબ લીમખેડાના પાલ્લી ગામ નજીક કાર અને ટ્રક વચ્ચે ગઈરાત્રે અકસ્માત સર્જાયો હતો. જેમાં ૪ શ્રદ્ધાળુઓના મોત નિપજયા હતા, જયારે ૮ લોકોને ઈજા પહોંચી છે. આ તમામ શ્રદ્ધાળુઓ પ્રયાગરાજથી પરત ફરી રહ્યા હતાં.

ઘટનાની જાણ થતાં પોલીસની ટીમ ઘટનાસ્થળે પહોંચી ગઈ હતી અને ઘાયલો અને મૃતકોને હોસ્પિટલમાં ખસેડવામાં આવ્યા હતાં.

પ્રયાગરાજના કુંભ મેળામાં સ્નાન કરીને પરત ફરી રહેલા ગુજરાતી શ્રદ્ધાળુઓની કાર રસ્તા પર સાઈડમાં ઉભેલી ટ્રક સાથે ટકરાતા ૪ શ્રદ્ધાળુઓ મોતે ભેટયા હતા, તેઓ ધોળકા અને અંકલેશ્વરના હોવાનું જાણવા મળ્યું છે. જયારે ૮ શ્રદ્ધાળુને ગંભીર ઈજાઓ પહોંચી હતી. મૃતકોની ડેડબોડીને પોસ્ટમોર્ટમ માટે મોકલી દેવામાં આવી છે. પોલીસે અકસ્માતનો ગુનો નોંધી વધુ તપાસ હાથ ધરી છે.

બીજી તરફ યુપીના પ્રયાગરાજ એટલે કે જ્યાં મહાકુંભ યોજાયો છે એ જ શહેરમાં ભયંકર માર્ગ અકસ્માત થયો છે જેમાં એક બોલેરો અને બસ વચ્ચે ભીષણ ટક્કરમાં ૧૦ શ્રદ્ધાળુઓના મોત નીપજ્યાં હતા જ્યારે અન્ય ૧૯ લોકો ઈજાગ્રસ્ત થયાની માહિતી સામે આવી રહી છે.

પોલીસે ઘટનાસ્થળની મુલાકાત પછી માહિતી આપી હતી કે આ દુર્ઘટના પ્રયાગરાજ મિરઝાપુર હાઈવે પર સર્જાઈ હતી. છત્તીસગઢના કોરબાથી શ્રદ્ધાળુઓ સંગમમાં સ્નાન કરવા મહાકુંભ તરફ જઈ રહૃાા હતા. આ દરમિયાન જ મોટો અકસ્માત સર્જાયો હતો.ઘટનાની જાણકારી મળતાં જ પોલીસ ટીમ ધસી આવી હતી અને ઘાયલોને તાત્કાલિક ધોરણે સ્થાનિક હોસ્પિટલમાં શિફ્ટ કરાયા હતા. અનેકની હાલત ગંભીર હોવાથી મૃતકાંક પણ વધી શકે છે.

મળતી માહિતી મુજબ પ્રયાગરાજના મેજા વિસ્તારમાં આ ભીષણ અકસ્માત શુક્રવાર-શનિવારની રાતે ૨ વાગ્યે સર્જાયો હતો. એક પૂરપાટ જતી બોલેરો અને બસ વચ્ચે ભીષણ ટક્કર થઇ હતી. આ ટક્કરને કારણે જોરદાર ધડાકો થયો હતો અને બોલેરોનો કચ્ચરઘાણ વળી ગયો હતો. તમામ મૃતકોમાં બોલેરોમાં સવાર શ્રદ્ધાળુઓ સામેલ છે.

સ્થાનિકોએ ઘટના બાદ ત્વરિત લોકોને બચાવવા પ્રયાસ હાથ ધર્યા હતા અને પોલીસને જાણ કરી હતી. મૃતકોના શબ કબજામાં લઇ પોસ્ટમોર્ટમ માટે મોકલી દેવામાં આવ્યા છે અને ઘટનાનું કારણ જાણવા માટે વધુ તપાસ હાથ ધરવામાં આવી રહી છે.

ટકકર એટલી ગંભીર હતી કે બોલેરોનો આગળનો ભાગ તૂંટી ગયો હતો. ભકતો રસ્તા પર ફેંકાઈ ગયા હતા. કોઈનો હાથ ભાંગી ગયો હતો તો કોઈનું માથું ફાટી ગયું હતું. ઘણા લોકો બોલેરોમાં ફસાઈ ગયા. બોલેરોમાંથી મૃતદેહો કાઢવામાં અઢી કલાક લાગ્યા હતાં.

કારને ગેસ કટરથી કાપવામાં આવી હતી. તે પછી જ મૃતદેહો બહાર કાવામાં આવ્યા હતા. ઘણા મૃતદેહોને ખરાબ રીતે નુકશાન થયું હતું. પોલીસે બેગમાંથી મળેલા આધાર કાર્ડ પરથી બે મૃતદેહોની ઓળખ કરી હતી, ઈશ્વરી પ્રસાદ જયસ્વાલ અને સોમનાથ દરી તરીકે તેમની ઓળખ થઈ છે.

જો આપને આ પોસ્ટ ગમી હોય તો શેર કરો...