દ્વારકા નજીક બરડિયા પાસે વહેલી સવારે બસને અકસ્માતઃ એકનું મૃત્યુ

Author: નોબત સમાચાર

દ્વારકા નજીક બરડિયા પાસે વહેલી સવારે બસને અકસ્માતઃ એકનું મૃત્યુ

બસમાં રહેલા અન્ય દસ યાત્રાળુ ઘાયલઃ

જામનગર તા. ૯ઃ દ્વારકા નજીકના બરડીયા પાસે આજે વહેલી સવારે યાત્રાળુઓની એક બસ રોડ ઉતરીને ગોથું મારી ગઈ હતી. સોમનાથથી દ્વારકા જગતમંદિરે દર્શનાર્થે જતાં યાત્રાળુઓમાંથી દસેક વ્યક્તિને નાની મોટી ઈજા થઈ છે અને એક વ્યક્તિનું ગંભીર ઈજા થવાથી મૃત્યુ નિપજ્યું છે. અકસ્માતની જાણ થતાં ૧૦૮ તથા પોલીસ દોડ્યા હતા.

દ્વારકા નજીકના બરડીયા ગામ પાસેથી આજે વહેલી સવારે ખાનગી ટ્રાવેલ્સની એક બસ પસાર થઈ રહી હતી. વીસેક જેટલા યાત્રાળુઓને સોમનાથ દર્શન કરાવ્યા પછી તેઓને આજે દ્વારકા સ્થિત જગતમંદિરે દર્શનાર્થે તે બસમાં લાવવામાં આવી રહ્યા હતા.

આ બસ સવારે પાંચેક વાગ્યે બરડીયા પાસે પહોંચી ત્યારે તેના ચાલકે કોઈ કારણથી સ્ટીયરીંગ પરનો કાબુ ગુમાવતા આ બસ રોડ ઉતરીને ગોથું મારી ગઈ હતી. વહેલી સવારે યાત્રાળુઓની ચીસોથી ધોરીમાર્ગ ગાજી ઉઠ્યો હતો. ત્યાંથી પસાર થતાં કોઈ અન્ય વાહનચાલકે પોલીસ તથા ૧૦૮ને જાણ કરતા એમ્બ્યુલન્સ દોડી આવી હતી.

બસમાંથી બહાર નીકળી રહેલા યાત્રાળુઓએ અંદર ઘાયલ થઈ પડેલા અન્ય યાત્રાળુઓને બહાર કાઢવાના પ્રયત્ન શરૂ કર્યા હતા. જેમાં વારાફરતી એકાદ ડઝન જેટલા યાત્રાળુ ઘાયલ થયેલા જણાઈ આવ્યા હતા તેમાંથી એક વ્યક્તિનું મૃત્યુ નિપજ્યું છે. બાકીના ઈજાગ્રસ્તોને સારવાર માટે દ્વારકા દવાખાને ખસેડવામાં આવ્યા હતા. બનાવની જાણ થતાં પોલીસ પણ દોડી ગઈ હતી.

જો આપને આ પોસ્ટ ગમી હોય તો શેર કરો...