લાંચના કેસમાં બાર વર્ષ પહેલાં ઝડપાયેલા લેન્ડ રેકર્ડ કચેરીના કર્મચારીનો છૂટકારો

Author: નોબત સમાચાર

લાંચના કેસમાં બાર વર્ષ પહેલાં ઝડપાયેલા લેન્ડ રેકર્ડ કચેરીના કર્મચારીનો છૂટકારો

લાંચ કેસમાં ફરિયાદ ગૌણ પુરાવો છેઃ આરોપી પક્ષની દલીલઃ

જામનગર તા. ૨૭: જામનગરની લેન્ડ રેકર્ડની કચેરીનો કર્મચારી લાંચ માંગતો હોવાની બાર વર્ષ પહેલાં એસીબીમાં ફરિયાદ થયા પછી છટકુ ગોઠવી આ કર્મચારીને ઝડપી લેવાયો હતો. તે કેસ ચાલી જતાં ફરિયાદી જ ફરી ગયા હોવાથી અને સાંયોગિક પુરાવો રેકર્ડ પર આવ્યો ન હોવાથી અદાલતે આરોપીનો છૂટકારો ફરમાવ્યો છે.

આ ચકચારી કેસની વધુ વિગત મુજબ ગઈ તા.૨૯-૫-૧૨ના દિને જામનગરના એસીબી પોલીસ સ્ટેશનમાં એક આસામીએ ફરિયાદ નોંધાવી તેમાં જણાવ્યું હતું કે, જામનગર ડિસ્ટ્રીક્ટ ઈન્સ્પેક્ટર ઓફ લેન્ડ રેકર્ડની કચેરીના કર્મચારી બાબુલાલ દેવજીભાઈ મકવાણા રેકર્ડની ખરી નકલ ઝડપથી આપવા માટે રૂ.૧ હજાર માંગે છે. આ કચેરીના રેકર્ડ કીપરને પકડી પાડવા જે તે વખતે છટકુ ગોઠવાયું હતું.

તેમાં રેકર્ડ રૂમના સર્વેયર સહિત અન્ય નાગરિકોની ઉપસ્થિતિમાં આરોપીની ધરપકડ કરી લાંચની રકમ કબજે કરાઈ હતી. આ કેસ જામનગરની સેશન્સ કોર્ટમાં ચાલવા પર આવ્યો હતો.

કેસમાં ફરિયાદ પક્ષે લેન્ડ રેકર્ડ કચેરીના ડે. ડાયરેક્ટર આર.કે. ગાંધી, મામલતદાર વી.આર. વરૂ, ખાનગી સર્વેયર રમેશ ગાગલીયા, એસીબીના તત્કાલિન પીઆઈ બી.ડી. જાડેજા સહિત સાત વ્યક્તિની જુબાની રજૂ કરી હતી. તેની સામે આરોપી પક્ષે દલીલ કરી હતી કે, ફરિયાદીની જુબાનીમાં લાંચની આરોપીએ માગણી કર્યાનું સાબિત થતું નથી. ફરિયાદીને ફરી ગયેલા જાહેર કરવામાં આવ્યા છે ત્યારે લાંચની માગણી સીધી કે આડકતરી રીતે કરાઈ રહી હોવાનું રેકર્ડ પર આવતું નથી. લાંચની રકમ કબજે કરવામાં આવી હોવા માત્રથી લાંચ લીધી હોવાનું અનુમાન ન કરી શકાય. અદાલતે તે દલીલ ગ્રાહ્ય રાખી આરોપી બાબુલાલ દેવજીભાઈ મકવાણાનો છૂટકારો ફરમાવ્યો છે. આરોપી તરફથી વકીલ વી.એચ. કનારા, એસ.બી. વોરીયા, ડી.એન. ભેડા, વી.ડી. બારડ, આર.ડી. સીસોટીયા, જે.એમ. નંદાણીયા, આર.એન. વસરા, આર.એ. સફીયા, વી.એસ. ખીમાણીયા, પી.એન. રાડીયા રોકાયા હતા.

જો આપને આ પોસ્ટ ગમી હોય તો શેર કરો...