બેંકની બનાવટી એડવાઈઝરી બનાવી રૂ.૩૮ લાખની ઉચાપતના કેસમાં છૂટકારો

Author: નોબત સમાચાર

બેંકની બનાવટી એડવાઈઝરી બનાવી રૂ.૩૮ લાખની ઉચાપતના કેસમાં છૂટકારો

બેંકના કેશીયર સામે કરાઈ હતી પોલીસમાં ફરિયાદઃ

જામનગર તા.ર : જામનગરની સુપર માર્કેટમાં આવેલી એક બેંકના કેશીયરે બેંકની બનાવટી એડવાઈઝરી બનાવી, ખોટી સહી કરી રૂ.૩૮ લાખની ઉચાપત કર્યાની પોલીસમાં કરાયેલી ફરિયાદ પછી તે કેસ ચાલી જતાં અદાલતે આરોપીનો છૂટકારો ફરમાવ્યો છે.

જામનગરની સુપર માર્કેટમાં આવેલી સ્ટેટ બેંક ઓફ ઈન્ડિયાની શાખામાં ચીફ મેનેજર તરીકે ફરજ બજાવતા અધિકારીએ તે બેંકમાં કેશીયર તરીકે કામ કરતા હરીશ ગોવિંદભાઈ ગઢવી સામે પોલીસમાં ફરિયાદ કરી હતી.

તેમાં જણાવાયું હતું કે, બેંકમાં ખાતું ધરાવતી શક્તિ ઓઈલ કોર્પોરેશન, સોમનાથ ટ્રેડર્સ, એસ.બી. કોર્પોરેશન નામની ત્રણ પેઢીએ રૂ.૩૮ લાખના જુદા જુદા ચેક પોતાના ખાતામાં જમા કરવા માટે આપ્યા હતા. તે ચેક ઉત્તર પ્રદેશના અલીગઢ જિલ્લામાં આવેલી બેંકની શાખાના હતા. તે રકમ ઉપરોક્ત પેઢીના ખાતામાં જમા થયા પછી તેમાંથી કેશીયર હરીશ ગઢવીએ પૈસા ઉપાડી લીધા હતા અને ઉચાપત કરી હતી. ઉપરોક્ત કેસ ચાલવા પર આવતા બચાવપક્ષે દલીલ કરી હતી કે, જે એડવાઈઝરીઓ રજૂ થઈ છે તેમાં કોની સહી છે? સહી સાચી છે કે ખોટી છે? તે બાબત એક્સપર્ટ દ્વારા ચકાસવામાં આવી નથી. અદાલતે તે દલીલો ગ્રાહ્ય રાખી આરોપી હરીશ ગોવિંદભાઈ ગઢવીનો છૂટકારો ફરમાવ્યો છે. આરોપી તરફથી વકીલ રાજેશ ગોસાઈ, વિશાલ જાની, એચ.આર. ગોહિલ, રજનીકાંત નાખવા, નિતેશ મુછડીયા રોકાયા હતા.

જો આપને આ પોસ્ટ ગમી હોય તો શેર કરો...