જામનગરમાં વાયુનગર-ખારા બેરાજા વાળો માર્ગ વધુ ત્રણ માસ બંધ રહેશે

Author: નોબત સમાચાર

જામનગરમાં વાયુનગર-ખારા બેરાજા વાળો માર્ગ વધુ ત્રણ માસ બંધ રહેશે

ભૂગર્ભ ગટરની કામગીરી માટે

જામનગર તા. ૨: જામનગરમાં વાયુનગર વાળા જંકશન થી ખારા બેરાજાના જંકશન સુધીનો માર્ગ ભૂગર્ભ ગટરની કામગીરી માટે બંધ રાખવામાં આવ્યો છે. જે માટે માર્ગ બંધ રાખવાના જાહેરનામાની મુદતમાં વધારો કરવામાં આવ્યો છે.

જામનગર મહાનગર પાલિકા કમિશનર ડી. એન. મોદી દ્વારા બી.પી.એમ.સી. એકટ ૧૯૪૯ ની કલમ -૨૩૬ ની જોગવાઈ હેઠળ મળેલ સતાની રૂએ જાહેર નામુ પ્રસિદ્ધ કરવામાં આવ્યું છે. જેમાં જામનગર મહાનગર પાલિકાની હદમાં એરફોર્સ- ૧ ગેટથી ઢીચડા ગામ તરફ જતા રસ્તામાં વાયુનગરવાળા રોડના જંકશનથી ખારા બેરાજાના જંકશન સુધી ભૂગર્ભ ગટર પાઈપ લાઈન નાખવા કામગીરી કરવામાં આવી રહી છે.

જે કામગીરી અનુસંધાને સલામતીના ભાગરૂપે તેમજ અકસ્માત નિવારવાના હેતુથી પ્રથમ તા.૦૭-૦૨-૨૦૨૫થી તા.૦૬-૦૪-૨૦૨૫ સુધી આ માર્ગમાં તમામ વાહન વ્યવહાર બંધ રાખવા આદેશ કરવામાં આવ્યો હતો. જે જાહેરનામાંની નવી સમય મર્યાદા તા.૦૬/૦૭/૨૦૨૫ સુધી લંબાવવામાં આવી છે. જે કોઈ વ્યક્તિ આ હુકમનો ભંગ કરશે તેની સામે ધી બી.પી.એમ.સી. એકટ ૧૯૪૯ કલમ -૩૯૨ અનુસાર દંડની કાર્યવાહી કરવામાં આવશે.

એરફોર્સ-૧ ગેટથી ઢીચડા ગામ તરફ જતા રસ્તામાં વાયુનગરવાળા રોડના જંક્શન થી ખારા બેરાજાના જંકશન સુધી જવાનો રસ્તો બંધ રહેશે. જેની વૈકલ્પિક વ્યવસ્થા માટે એરફોર્સ-૧ ગેટથી ઢીચડા ગામ તરફ જતા રસ્તામાં વાયુનગર થઇ સ્વામિનારાયણ ધામ સોસાયટી થઇ જાડાના ૧૮ મીટર ડી.પી.રોડ પર આવેલ દરગાહ થઇ બેડી બંદર રીંગ રોડ તરફ જવાનો રોડ તથા તેને સંલગ્ન અન્ય રસ્તાઓ વાહન વ્યવહાર માટે ચાલુ રહેશે.

ખારા બેરાજાના જંકશનથી ઢીચડા ગામ તરફ જતા રસ્તામાં ખારા બેરાજાના જંકશનથી વાયુનગરવાળા રોડના જંકશન સુધી જવાનો રસ્તો બંધ રહેશે. જેની વૈકલ્પિક વ્યવસ્થા માટે ખારા બેરાજાના જંકશન થઇ શાહમુરાદશા દરગાહ થઇ ઢીચડા ગામના રસ્તા પર ૬૬ કે.વી. સબ સ્ટેશન થઇ બેડી બંદર રીંગ રોડ તરફ જવાનો રોડ તથા તેને સંલગ્ન અન્ય રસ્તાઓ ચાલુ રહેશે.

જો આપને આ પોસ્ટ ગમી હોય તો શેર કરો...