ખ્યાતિ હોસ્પિટલકાંડના ફરાર ડાયરેક્ટર કાર્તિક પટેલની ધરપકડ

Author: નોબત સમાચાર

ખ્યાતિ હોસ્પિટલકાંડના ફરાર ડાયરેક્ટર કાર્તિક પટેલની ધરપકડ

લૂક આઉટ નોટીસ પછી આગોતરા જામીન અરજી પણ કરી હતીઃ

અમદાવાદ તા. ૧૮:ખ્યાતિ હોસ્પિટલના ફરાર ડાયરેક્ટર કાર્તિક પટેલની ધરપકડ થઈ છે. આરોપીને અમદાવાદ ક્રાઈમ બ્રાન્ચે એરપોર્ટ ઉપરથી દબોચ્યો છે. હવે સનસનીખેજ ખુલાસાઓ થશે. તેના માટે લૂકઆઉટ નોટીસ જારી થઈ હતી. આ પહેલા આરોપી ઓસ્ટ્રેલિયા અને પછી દુબઈ ભાગી ગયો હતો, અને વિદેશથી જામીન અરજી પણ કરી હતી.

ખ્યાતિ હોસ્પિટલકાંડમાં અમદાવાદ ક્રાઈમ બાન્ચે હોસ્પિટલના ડાયરેક્ટર અને અત્યાર સુધી ફરાર કાર્તિક પટેલને દબોચી લીધો છે. મોડી રાત્રે અમદાવાદ એરપોર્ટ પરથી તેની ધરપકડ કરાઈ છે. ક્રાઈમ બ્રાન્ચની ટીમે ઈન્ટરનેશનલ પોર્ટ પરથી તેની ધરપકડ કરી છે. કૌભાંડ બહાર આવ્યું ત્યારથી કાર્તિક પટેલ ફરાર હતો.

આ કેસમાં તબક્કાવાર ઘણાં આરોપીઓ પકડાઈ ચૂક્યા છે, અને કેસમાં મુખ્ય આરોપી કાર્તિક પટેલ જ ફરાર હતો. હવે સકંજામં આવેલા કાર્તિક પટેલની પૂછપરછમાં મોટા ખુલાસા થઈ શકે છે. અગાઉ કાર્તિક સામે લૂક આઉટ નોટીસ જાહેર કરાઈ હતી. એટલું જ નહીં, તેણે વિદેશથી બેઠા-બેઠા આગોતરા જામીન અરજી પણ કરી હતા, જામીન મંજુર પણ થયા નહોતા.

સૂત્રોના મતે કાર્તિક પટેલ પહેલા ઓસ્ટ્રેલિયા અને ત્યારપછી દુબઈ ભાગી ગયો હતો. હવે તેને આરોપીની જેમ ક્રાઈમ બ્રાન્ચની કસ્ટડીમાં રાખવામાં આવશે.

અગાઉ અમદાવાદ ગ્રામ્ય સેસન્સ કોર્ટમાં તેની આગોતરા જામીન અરજી પર સુનાવણી થઈ હતી. કાર્તિકે વિદેશમાં બેઠા બેઠા પોતાના જમાઈ મારફતે આગોતરા જામીન અરજી કરી હતી. હોસ્પિટલમાં તમામ લોકોને પ્રેશર આપીને નફો લાવવાનો કાર્તિક પટેલનો ઉદ્દેશ હતો.

ચેરમેન, ડાયરેક્ટરની મિટિંગમાં ફ્રી કેમ્પ યોજવા માર્કેટીંગ ટીમને કાર્તિક પટેલ ફોર્સ કરતો હતો અને હોસ્પિટલમાં આર્થિક વ્યવહાર કાર્તિક પટેલની સૂચનાથી જ ચાલતો હતો.

ઉલ્લેખનિય છે કે, થોડા દિવસો પહેલા ખ્યાતિ હોસ્પિટલકાંડ કેસની તપાસમાં અમદાવાદ ક્રાઈમ બ્રાન્ચે સૌથી મોટો ખુલાસો કર્યો હતો. જેમાં ખ્યાતિ હોસ્પિટલમાં પ્રધાનમંત્રી જન આરોગ્ય યોજના હેઠળ છેલ્લા ત્રણ વર્ષમાં ૩૮૪ર ઓપરેશન કરવામાં આવ્યાની માહિતી અપાઈ હતી અને તેમાં ૧૧ર દર્દીઓના ઓપરેશન દરમિયાન કે ત્યારપછીની સારવાર દરમિયાન મોત નિપજ્યાનો દાવો કરાયો હતો.

જો આપને આ પોસ્ટ ગમી હોય તો શેર કરો...