રેંકડી અને પથારાવાળાઓના માલ-સાધનો જપ્ત થતા રોજગારી ઝુંટવાઈ જાય છેઃ આવેદન

Author: નોબત સમાચાર

રેંકડી અને પથારાવાળાઓના માલ-સાધનો જપ્ત થતા રોજગારી ઝુંટવાઈ જાય છેઃ આવેદન

ભવિષ્યમાં સ્ટ્રીટ વેન્ડરને ઓપન જગ્યા ફાળવાઈ શકેઃ ડીએમસી

જામનગર તા. ર૪: જામનગરમાં મહાનગર પાલિકા એસ્ટેટ શાખા દ્વારા જાહેર માર્ગે ઊભા રહેલા રેંકડીધારકો અને પથારાવાળા સહિતનાઓના દબાણો દૂર કરવામાં આવી રહ્યા છે. તેની સામે ધંધાર્થીઓમાં નારાજગી ફેલાઈ છે. ગઈકાલે રેંકડીધારકો, પથારાવાળાઓ દ્વારા મહાનગરપાલિકા દ્વારા નાયબ કમિશનરને આવેદન પાઠવી રજૂઆત કરવામાં આવી હતી.

જામનગર મહાનગર પાલિકાની એસ્ટેટ શાખા દ્વારા છેલ્લા કેટલાક દિવસથી ખાસ દબાણ હટાવ ઝુંબેશ ચલાવાઈ રહી છે. ખાસ કરીને સરૂસેક્શન રોડ, પંચવટી સહિતના કેટલાક વિસ્તારમાં જાહેર માર્ગે રેંકડી, પથારાવાળા ખડકાઈ જતા હોવાથી શહેરમાં ટ્રાફિક સમસ્યા સર્જાય છે. આથી મહાનગરપાલિકાની એસ્ટેટ શાખા દ્વારા દબાણ હટાવ ઝુંબેશ ચલાવાઈ રહી છે અને રેંકડી-પથારાવાળાઓને દૂર કરી કેટલાક કિસ્સામાં તેમનો માલસામાન પણ જપ્ત કરવામાં આવે છે.

આથી રેંકડીધારકો-પથારાવાળાઓમાં નારાજગી ફેલાઈ છે, અને ગઈકાલે જાગૃત યુવા ફાઉન્ડેશનના પ્રમુખ હાર્દિકસિંહ ચુડાસમાની આગેવાનીમાં અસંખ્યા રેંકડીધારકો-પથારાવાળાઓએ મહાનગર પાલિકા કચેરીમાં પહોંચ્યા હતાં અને નાયબ મ્યુનિ. કમિશનરને આવેદન પાઠવી રજૂઆત અને માગણી કરી હતી કે અમો વર્ષોથી ધંધો કરીને પોતાના પરિવારનું ગુજરાન ચલાવીએ છીએ તથા જાહેર માર્ગે ટ્રાફિક સમસ્યા થાય નહીં તેનું પણ ધ્યાન રાખીએ છીએ.

જો રેંકડી-પથારાવાળાને ધંધો કરવા દેવામાં નહીં આવે તો રોજગારીનો પ્રશ્ન ઉપસ્થિત થશે, અને જરૂર પડ્યે ઉગ્ર આંદોલન પણ કરવામાં આવશે તેવી ચિમકી પણ અપાઈ છે.

આ બાબતે ડીએમસી દેવેન્દ્રસિંહ ઝાલાએ જણાવ્યું હતું કે, શહેરમાં માનવ વસ્તી અને વાહનોનું પ્રમાણ સતત વધી રહ્યું છે. તેની સામે રોડ-રસ્તા સાંકડા પડે છે, જો કે ભવિષ્યમાં સ્ટ્રીટ વેન્ડર પોલિસી બની શકે છે, જ્યારે આવા ધંધાર્થીઓ માટે વિચારણા થશે, અને તેમના માટે યોગ્ય જગ્યા ફાળવી શકાય છે. તેનો મતલબ એવો થાય છે કે હાલની ટ્રાફિક સમસ્યા સર્જાતી હોવાથી દબાણ હટાવ ઝુંબેશ યથાવત્ રહેશે.

જો આપને આ પોસ્ટ ગમી હોય તો શેર કરો...