હેલ્પરનું કામ કરતા કર્મચારીને બાથરૂમ સાફ કરવાનું કહી ચાર શખ્સે વર્તાવ્યો ત્રાસ

Author: નોબત સમાચાર

હેલ્પરનું કામ કરતા કર્મચારીને બાથરૂમ સાફ કરવાનું કહી ચાર શખ્સે વર્તાવ્યો ત્રાસ

જ્ઞાતિ પ્રત્યે હડધૂત પણ કર્યાની ફરિયાદઃ

જામનગર તા. ૨૪: ઓખામંડળના સુરજકરાડીમાં રહેતા એક યુવાન ખાનગી પેઢીમાં હેલ્પરની નોકરી કરે છે. તેઓને નોકરીના સ્થળે બાથરૂમ-ટોયલેટ સાફ કરવાનું કહી છેલ્લા એકાદ વર્ષથી આ કંપનીના સાઈટ મેનેજર સહિતના ચાર વ્યક્તિ પજવવા ઉપરાંત જ્ઞાતિ પ્રત્યે હડધૂત કરતા હોવાની પોલીસમાં ફરિયાદ કરવામાં આવી છે.

દેવભૂમિ દ્વારકા જિલ્લાના ઓખામંડળમાં આવેલા સુરજકરાડીમાં રહેતા લખમણભાઈ દેવાભાઈ હાથીયા ટાટા કંપનીના એનએફ પ્લાન્ટમાં હેલ્પર તરીકે નોકરી કરે છે. તેઓને છેલ્લા એકાદ વર્ષથી મીઠાપુરની ટાઉનશીપમાં રહેતા અને સાઈટ મેનેજર તરીકે નોકરી કરતા દીપસિંહ ચૌહાણ ટોયલેટ, બાથરૂમ સફાઈ માટે કહેતા હતા.

લખમણભાઈ તથા અન્ય વ્યક્તિઓએ સફાઈનો ઈન્કાર કરી પોતે હેલ્પરનું કામ કરે છે તેમ કહેતા તેઓને દીપસિંહ ચૌહાણ તેમજ આરંભડા ગામના રવિ રામાનુજ, મયુર બારીયા અને ભીમરાણાના સતિષ હરીયાણીએ જ્ઞાતિ પ્રત્યે હડધૂત કર્યા હતા. તેથી લખમણભાઈએ વીઓલીયા કંપનીમાં ચારેય શખ્સ વિરૂદ્ધ રજૂઆત કરતો ઈ-મેઈલ કર્યાે હતો.

આ બાબતની જાણકારી મળતા દીપસિંહના કહેવાથી રવિ, મયુર તથા સતિષે નોકરી દરમિયાન અવારનવાર માનસિક ત્રાસ આપી લખમણભાઈને હડધૂત કર્યા હતા અને સતિષે જાનથી મારી નાખવાની ધમકી પણ આપી હતી તેવી ફરિયાદ મીઠાપુર પોલીસ મથકમાં લખમણભાઈએ નોંધાવી છે.

જો આપને આ પોસ્ટ ગમી હોય તો શેર કરો...