જામસખપુર ગામમાં મકાનમાંથી ઝડપાઈ શરાબની ૧૧૪૦ બોટલઃ એકની અટકાયત

Author: નોબત સમાચાર

જામસખપુર ગામમાં મકાનમાંથી ઝડપાઈ શરાબની ૧૧૪૦ બોટલઃ એકની અટકાયત

ત્રણ આરોપીની હાથ ધરાઈ શોધખોળઃ બે બોટલ સાથે અન્ય બે ઝડપાયાઃ

જામનગર તા. ૧૩ઃ જામજોધપુર તાલુકાના જામસખપર ગામના એક શખ્સના મકાનમાં ગઈકાલે પોલીસે પૂર્વ બાતમીના આધારે દરોડો પાડી તલાશી લેતા ત્યાંથી દારૂની ૧૧૪૦ બોટલ ઝડપાઈ ગઈ છે. એક શખ્સની ધરપકડ કરાઈ છે. ત્રણના નામ પોલીસને મળ્યા છે. જ્યારે બેડ ટોલનાકા પાસેથી અને સિક્કા એમટીએફ ગોળાઈમાંથી બે શખ્સ બે બોટલ સાથે મળી આવ્યા છે.

જામજોધ૫ુર તાલુકાના તરસાઈ ગામથી સખપર ગામ તરફ ગઈકાલે પીઆઈ વાય.જે. વાઘેલા તથા જામજોધપુર પોલીસ સ્ટેશનના સ્ટાફ દ્વારા કરવામાં આવી રહેલા પેટ્રોલિંગમાં પો.કો. મયુરસિંહ, નવલભાઈ, આર.આર. જાડેજાને બાતમી મળી હતી કે, જામસખપર ગામમાં ભાવેશ નારણભાઈ મોરી નામના શખ્સના મકાનમાં અંગ્રેજી શરાબનો મોટો જથ્થો પડ્યો છે. તે બાતમીથી ગ્રામ્ય ડીવાયએસપી આર.બી. દેવધાને વાકેફ કરાયા પછી ગઈકાલે રાત્રે જામજોધપુર પોલીસ સ્ટેશનના સ્ટાફે ભાવેશ મોરીના મકાનમાં દરોડો પાડી તલાશી લીધી હતી.

તે મકાનમાંથી ભારતીય બનાવટના અંગ્રેજી શરાબની ૧૧૪૦ બોટલ મળી આવી હતી. પોલીસે રૂ. પ લાખ ૭૦ હજારની કિંમતનો શરાબનો જથ્થો તથા રૂ. પ હજારનો મોબાઈલ જપ્ત કરી સ્થળ પરથી પોરબંદર જિલ્લાના રાણાવાવ તાલુકાના મોટા બારીપરાના ભૂરા પાંચાભાઈ કરમટા નામના શખ્સની ધરપકડ કરી છે. આ શખ્સે પોતાના સાગરિત રાજુ નારણભાઈ મોરી, સુરેશ નારણભાઈ મોરી, ભાવેશ નારણભાઈ મોરીના નામ આપ્યા છે. પોલીસે ચારેય સામે દારૂબંધી ભંગ અંગે ગુન્હો નોંધી ભૂરા કરમટાની પૂછપરછ હાથ ધરી છે.

જામનગર-ખંભાળિયા માર્ગ પર આવેલા બેડ ટોલનાકા પાસેથી ગઈરાત્રે પસાર થઈ રહેલા જામનગરની ખોડિયાર કોલોની સામેના શક્તિનગરમાં રહેતા અશોકસિંહ ઉર્ફે કાના પ્રભાતસિંહ જાડેજાને રોકાવી સિક્કા પોલીસ સ્ટેશનના સ્ટાફે તલાશી લેતા આ શખ્સના કબજામાંથી દારૂની બોટલ મળી આવી હતી.

જામનગર તાલુકાના સિક્કા ગામની એમટીએફ ગોળાઈ પાસેથી ગઈરાત્રે શાપર ગામનો ભીમજી વરજણભાઈ વિજાણી નામનો શખ્સ દારૂની એક બોટલ સાથે ઝડપાઈ ગયો છે.

જો આપને આ પોસ્ટ ગમી હોય તો શેર કરો...