બજેટ સત્ર વિકસિત ભારતને આપશે નવી ઊર્જાઃ વડાપ્રધાન

Author: નોબત સમાચાર

બજેટ સત્ર વિકસિત ભારતને આપશે નવી ઊર્જાઃ વડાપ્રધાન

આવતીકાલે નાણામંત્રી નિર્મલા સીતારમણ રજૂ કરશે કેન્દ્રિય બજેટઃ

નવી દિલ્હી તા. ૩૧: બજેટસત્ર શરૂ થતા પહેલા વડાપ્રધાન નરેન્દ્ર મોદીએ કહ્યું હતું કે બજેટસત્ર વિકસિત ભારતને નવી ઊર્જા આપશે.

આજથી બજેટ સત્રની શરૂઆત થઈ છે. પીએમ મોદીએ બજેટ સત્ર શરૂ થયા પહેલા દેશને સંબોધન કર્યું હતું. બજેટ સત્ર ૩૧ જાન્યુઆરીથી ૪ એપ્રિલ સુધી બે તબક્કામાં યોજાશે. સત્રનો પહેલો તબક્કો ૧૩ ફેબ્રુઆરીએ સમાપ્ત થશે અને બીજો તબક્કો ૧૦ માર્ચથી શરૂ થશે.

વડાપ્રધાન નરેન્દ્ર મોદીએ બજેટ પહેલા દેશને સંબોધતા કહ્યું કે, દેશના લોકોએ મને ત્રીજી વખત આ મહત્ત્વપૂર્ણ જવાબદારી સોંપી છે અને આ ત્રીજા કાર્યકાળનું પહેલું પૂર્ણ બજેટ છે.

મિશન મોડમાં કામ કરવાની પ્રતિબદ્ધતા વ્યક્ત કરતા તેમણે કહ્યું કે 'નારી શક્તિનું ગૌરવ સ્થાપિત કરવું છે, આ સત્ર વિકસિત ભારતને નવી ઊર્જા આપશે. ભારતની તાકાત તેને લોકશાહી વિશ્વમાં એક ખાસ સ્થાન આપે છે. હું વિશ્વાસ સાથે કહી શકું છું કે ર૦૪૭ માં જ્યારે દેશ તેની સ્વતંત્રતાના ૧૦૦ મા વર્ષગાંઠની ઉજવણી કરશે ત્યારે દેશે લીધેલા વિકસિત ભારતનો સંકલ્પ પૂર્ણ થશે અને આ બજેટ એક નવો આત્મવિશ્વાસ પેદા કરશે.'

નિર્મલા સીતારમણ આઠમું બજેટ રજૂ કરશે

નાણામંત્રી નિર્મલા સીતારમણ સતત આઠમું બજેટ રજૂ કરશે. છેલ્લા અઢીથી ત્રણ દાયકામાં આ પહેલીવાર બનશે જ્યારે કોઈ નાણામંત્રી સતત આઠમી વખત બજેટ રજૂ કરશે. નિર્મલા પહેલા અરૂણ જેટલી પાંચ વર્ષ સુધી નાણામંત્રી હતાં, પરંતુ તેઓ પણ તબિયત સારી ન હોવાના કારણે એક વખત બજેટ રજૂ કરી શક્યા ન હતાં.

તા. ૧૩ ફેબ્રુ. સુધીના પ્રથમ તબક્કા પછી બજેટનો બીજો તબક્કો ૧૦ માર્ચથી શરૂ થશે. આમ, બજેટ સત્ર બે તબક્કામાં યોજાશે.

જો આપને આ પોસ્ટ ગમી હોય તો શેર કરો...