પત્ની તથા સાસુ-સસરાએ ઘરમાં ઘૂસી બારીના કાચ, પ્લેટફોર્મ તોડી નાખ્યાની રાવ

Author: નોબત સમાચાર

પત્ની તથા સાસુ-સસરાએ ઘરમાં ઘૂસી બારીના કાચ, પ્લેટફોર્મ તોડી નાખ્યાની રાવ

ઘરમાંથી કિંમતી પ્લોટના કાગળો પણ ઉઠાવી ગયાઃ

જામનગર તા. ૧૨: જામનગરના એક યુવાનના ઘરમાં ઘૂસી તેના પત્ની તથા સાસુ-સસરાએ તોડફોડ મચાવવા ઉપરાંત આ યુવાનના પિતાના કિંમતી પ્લોટના ઓરીજીનલ કાગળો ઉઠાવી લીધાની પોલીસમાં ફરિયાદ કરાઈ છે. છ મહિના પહેલાંના આ બનાવ અંગે પોલીસે ગુન્હો નોંધી તપાસ શરૂ કરી છે.

જામનગરના દરબારગઢ વિસ્તારમાં આવેલી નુરફળીમાં અલમહંમદી એપાર્ટમેન્ટમાં રહેતા ઈમરોઝભાઈ અબ્દુલકાદર મેતર નામના ઘાંચી યુવાને પોતાના પત્ની શબનમબેન તેમજ સસરા હસનભાઈ મજગુલ અને સાસુ શબાનાબેન હસનભાઈ સામે સિટી એ ડિવિઝન પોલીસ સ્ટેશનમાં ફરિયાદ નોંધાવી છે.

ફરિયાદમાં જણાવવામાં આવ્યા મુજબ તેમના ઘરમાં ગઈ તા.૪ જુનની બપોરે બારેક વાગ્યે ધસી આવેલા પત્ની શબનમબેન તથા સાસુ-સસરાએ તોડફોડ મચાવી હતી. આ વ્યક્તિઓએ ઈલેકટ્રીક બોર્ડ તથા વાયર ખેંચી કાઢયા હતા અને બારીના કાચ અને રસોડાનું પ્લેટફોર્મ ભાંગી નાખ્યું હતું. તે પછી પલંગની પેટીમાં રાખેલા લાલપુરના સેતાલુસ નજીકના ઈમરોઝભાઈના પિતાના નામના પ્લોટના અસલ કાગળો તથા ઝેરોક્ષ પણ આ વ્યક્તિઓ ઉઠાવી ગયા હતા અને સસરા હસનભાઈએ થાય તે કરી લેવાની ધમકી આપી હતી.

ઈમરોઝભાઈ તથા શબનમબેનના નિકાહ થયા પછી કેટલાક મહિનાઓથી શબનમબેન રીસામણે પિયર ચાલ્યા ગયા છે. તે દરમિયાન સાત મહિના પહેલાં પિતા તથા માતા સાથે આવી આ પરિણીતાએ પતિના ઘરમાં ઉપરોક્ત બબાલ કરી હતી. પોલીસે ગુન્હો નોંધી તપાસ શરૂ કરી છે.

જો આપને આ પોસ્ટ ગમી હોય તો શેર કરો...