ગોકુલનગરમાં પાડોશીઓ બાખડ્યાઃ એક મહિલાને હેમરેજ

Author: નોબત સમાચાર

ગોકુલનગરમાં પાડોશીઓ બાખડ્યાઃ એક મહિલાને હેમરેજ

બંને પક્ષની સામસામી ફરિયાદઃ ત્રણ મહિલા સહિત સાત સામે ગુન્હોઃ

જામનગર તા. ૧૨: જામનગરના ગોકુલનગર નજીકની સોમનાથ સોસાયટીમાં શનિવારે સાંજે બે પાડોશી પરિવારો વચ્ચે બઘડાટી બોલી ગઈ હતી. જેમાં એક મહિલાને હેમરેજ સહિતની ઈજા થઈ છે. બંને પક્ષે સામસામી ફરિયાદ નોંધાવી છે. પોલીસે ત્રણ મહિલા સહિત સાત સામે ગુન્હો નોંધ્યો છે. મકાન ખાલી કરવા તથા ખટપટ બંધ કરવાના મુદ્દે ઝઘડો થયાનું ખૂલ્યું છે.

જામનગરના ગોકુલનગર વિસ્તારમાં આવેલી સોમનાથ સોસાયટીમાં વસવાટ કરતા રાહુલ ખીમાભાઈ ચાવડા નામના કોળી યુવાનને શનિવારે રાત્રે આઠેક વાગ્યે પાડોશમાં જ રહેતા શક્તિ કાનજીભાઈ કુકડીયા તથા લાલજી કાનજીભાઈ કુકડીયાએ તું મકાન ખાલી કરીને હજી કેમ ગયો નથી તેમ કહી ખટપટ બંધ કરવાની સૂચના આપી આ શખ્સોએ ઝઘડો કર્યાે હતો. ત્યારે લાલજીએ મારવા માટે લાકડી ઉગામતા અને રાહુલ બેસી જતા તે લાકડી રાહુલના માતા વિજયાબેનના માથામાં વાગી ગઈ હતી. તે પછી શક્તિએ રાહુલના બહેન સરલાબેનને માથામાં લાકડી ફટકારી હેમરેજ કરી નાખ્યું હતું. હુમલામાં આરતીબેન લાલજીભાઈ તથા ભારતીબેન શક્તિભાઈ કુકડીયા પણ તૂટી પડ્યા હતા. તેઓએ ઢીકાપાટુથી માર માર્યાે હતો. ગંભીર ઈજા પામેલા સરલાબેનને સારવાર માટે હોસ્પિટલમાં ખસેડવામાં આવ્યા છે. સિટી સી ડિવિઝન પોલીસે બે મહિલા સહિત ચાર હુમલાખોર સામે ગુન્હો નોંધ્યો છે.

તે ફરિયાદની સામે સોમનાથ સોસાયટી નજીક વસવાટ કરતા દિનેશભાઈ કાનજીભાઈ કુકડીયા ઉર્ફે લાલજી ઉર્ફે ટીનાભાઈએ વળતી ફરિયાદ નોંધાવી છે. જેમાં તેણે જણાવ્યા મુજબ પાડોશમાં રહેતા રાહુલ ખીમાભાઈ સાથે મકાન ખાલી કરવા બાબતે બોલાચાલી થયા પછી શનિવારે સાંજે રાહુલ, તેના પિતા ખીમાભાઈ રણમલભાઈ ચાવડા, સરલાબેન વિપુલભાઈ આરઠીયા, કાજલબેન ખીમાભાઈ ચાવડાએ ગાળો ભાંડી પતાવી દેવાની ધમકી આપી હુમલો કર્યાે હતો. જેમાં ખીમાભાઈએ માથામાં લાકડી ફટકારતા લાલજીને ઈજા થઈ હતી. જ્યારે સરલાબેને વીંઝેલી લાકડી રૂપાલીબેન કાનજીભાઈને વાગી ગઈ હતી. પોલીસે આ ફરિયાદ પણ રજીસ્ટરે લીધી છે.

જો આપને આ પોસ્ટ ગમી હોય તો શેર કરો...