અંબર ચોકડી પાસેના ગંદા દબાણો હટાવવાની વધુ એક વખત કાર્યવાહી

Author: નોબત સમાચાર

અંબર ચોકડી પાસેના ગંદા દબાણો હટાવવાની વધુ એક વખત કાર્યવાહી

માની લઈએ...કે આ દબાણો હવે કાયમ માટે દૂર થઈ રહ્યાં છે...!

જામનગરમાં અતિ વ્યસ્ત એવી અંબર ચોકડી પાસે રેલેવની વિશાળ જગ્યામાં વરસોથી કાચા ઝુંપડા, સામાન સાથેના દબાણો અંગે મનપા તંત્રએ રેલવેની જમીન હોવાથી અમે કાંઈ કરી શકીએ નહીં તેમ કાયમ માટે હાથ ઉંચા કરી દીધા હતાં. અને રેલવે તંત્રને તો જાણે કાંઈ પડી જ ન હોય તેમ ચાર-છ મહિને એકાદ વખત આવીને દબાણો દૂર કરવાનું નાટક કરે... અને રેલવે પોલીસ જાય કે તરત જ ગણતરીના કલાકોમાં એ જ માથાભારે દબાણકર્તાઓ ફરીથી ત્યાં જ ખડકાય જતા હતાં. આ સમસ્યા અંગે અખબારોએ સંલગ્ન તંત્રનું અનેક વખત, વારંવાર ટીકા સાથે નાગરિકોના રોષ સાથે ધ્યાન દોરવા છતાં કોઈ પરિણામલક્ષી કામગીરી થઈ જ નહીં... તેમાં જુના રેલવે સ્ટેશનનું જર્જરીત ખંઢેર બની ગયેલ માળખું દૂર કરાયું... તેટલી જમીન સમથળ કરી દેવાયા પછી પણ દબાણવાળાઓ રેલવેની ત્રિકોણીયાવાળી જમીનમાંથી દૂર કરાયા જ નહીં...! આ દબાણકર્તાઓ શા માટે ત્યાં જ પડ્યા પાથર્યા રહેવાની દાદાગીરી કરે છે, તે સૌ કોઈ જાણે છે... અહીં દેશી દારૂ, દેહવિક્રય જેવી અસામાજિક પ્રવૃત્તિઓ ચાલતી હોવાની હંમેશાંની ફરિયાદો સમગ્ર વિસ્તારમાં ફેલાવવાની ટીકાઓ હોવા છતાં મનપા તંત્ર, જિલ્લા વહીવટી તંત્ર, પોલીસ તંત્ર અને રેલવે તંત્રએ યોગ્ય સંકલન કરી કડક કાર્યવાહી કરવાની દરકાર કરી જ નથી.

આજે ફરીથી અંબર ચોકડી પાસેથી દબાણો દૂર કરાયા... સારી વાત છે... હવે ફલાય ઓવરના કારણે અંબર ચોકડી આસપાસના વિસ્તાર ચોખ્ખા-સ્વચ્છ અને સુંદર લાગે તવી વ્યવસ્થા કરવાની જરૂર છે ત્યારે આજે જે દબાણો હટાવાયા છે ત્યારપછી માની લઈએ કે હવે આ સ્થળે કોઈપણ નાના-મોટા દબાણો તંત્ર થવા દેશે નહીં.

જો આપને આ પોસ્ટ ગમી હોય તો શેર કરો...