જામનગરના આસામીને રૂ.૧ લાખના ચેક પરતની સજાઃ અપીલમાં પણ યથાવત્

Author: નોબત સમાચાર

જામનગરના આસામીને રૂ.૧ લાખના ચેક પરતની સજાઃ અપીલમાં પણ યથાવત્

અદાલતે બે વર્ષની કેદની ફટકારી છે સજાઃ

જામનગર તા. ૨૬: જામનગરના એક આસામીને રૂ.૧ લાખના ચેક પરતની ફરિયાદમાં અદાલતે બે વર્ષની સજા અને રૂ.૧ લાખ ચૂકવી આપવાનો આદેશ કર્યાે હતો. તે હુકમ સામે ઉપરની અદાલતમાં અપીલ કરાઈ હતી. ઉપલી અદાલતે પણ તે હુકમ યથાવત રાખ્યો છે.

જામનગરના કારખાનેદાર કીશોરભાઈ કાનજીભાઈ અટારા તથા તેમના પુત્ર કલ્પેશભાઈ કિશોરભાઈ પાસેથી થોડા વખત પહેલા શિવમ મોટર્સવાળા મુકેશભાઈ બી. ચાંદલીયાએ રૂ.પાંચેક લાખ હાથઉછીના લીધા હતા. તે રકમ પરત મંગાતા મુકેશભાઈએ ઉપરોક્ત રકમ માંથી રૂ.૧ લાખ ચૂકવવા માટે ચેક આપ્યો હતો.

ઉપરોક્ત ચેક બેંકમાં રજૂ કરવામાં આવતા અપૂરતા નાણા ભંડોળના શેરા સાથે ચેક પરત ફર્યાે હતો. તેથી નોટીસ પાઠવ્યા પછી મુકેશભાઈ ચાંદલીયા સામે જામનગરની અદાલતમાં ફરિયાદ કરાઈ હતી. તે કેસ ચાલી જતાં અદાલતે આરોપીને બે વર્ષની કેદની સજા ફટકારી હતી. તે હુકમ સામે ઉપરની અદાલતમાં અપીલ કરવામાં આવી હતી.

ઉપરોક્ત અપીલ ચાલી જતાં આરોપી પક્ષે દલીલ કરી હતી કે, ફરિયાદી પિતા-પુત્રની રૂ.પ લાખ હાથઉછીના આપવાની આર્થિક સ્થિતિ નથી અને ઈન્કમટેક્સ રેકર્ડમાં તે રકમનો કોઈ ઉલ્લેખ નથી. તે દલીલ સામે ફરિયાદી પક્ષે કરેલી દલીલો ગ્રાહ્ય રાખી અદાલતે નીચેની કોર્ટનો હુકમ યથાવત રાખી રૂ.૧ લાખ ફરિયાદીને ચૂકવી આપવાનો આદેશ કર્યાે છે. ફરિયાદી તરફથી વકીલ રાજેશ ગોસાઈ, વિશાલ જાની, એચ. આર. ગોહિલ, રજનીકાંત નાખવા, નિતેશ મુછડીયા, કરણ પટેલ રોકાયા હતા.

જો આપને આ પોસ્ટ ગમી હોય તો શેર કરો...