ચાર તબક્કામાં સ્પષ્ટ થયું કે દેશભરમાં પરિવર્તનનો પવન ફૂંકાઈ રહ્યો છેઃ કોંગી નેતાનો દાવો

Author: નોબત સમાચાર

ચાર તબક્કામાં સ્પષ્ટ થયું કે દેશભરમાં પરિવર્તનનો પવન ફૂંકાઈ રહ્યો છેઃ કોંગી નેતાનો દાવો

રાહુલ-પ્રિયંકાની લોકોને મતદાન કરવા અપીલઃ

નવી દિલ્હી તા. ર૦: આજે પાંચમા તબક્કાનું મતદાન થઈ રહ્યું છે, ત્યારે કોંગી નેતા રાહુલ ગાંધીએ એવો દાવો કર્યો છે કે, દેશભરમાં પરિવર્તનનો પવન ફૂંકાઈ રહ્યો છે. તેમણે તથા પ્રિયંકા ગાંધીએ લોકોને બહોળા પ્રમાણમાં મતદાન કરવાની અપીલ કરી છે.

લોકસભા ર૦ર૪ ની ચૂંટણીના પાંચમા તબક્કા માટે મતદાન ચાલુ છે. ત્યારે કોંગ્રેસના નેતા રાહુલ ગાંધીએ લોકોને મત આપવા અપીલ કરી છે. કોંગ્રેસ નેતાએ સોશિયલ મીડિયા પ્લેટફોર્મ એક્સ પર એક પોસ્ટ લખી હતી અને લોકોને ઘરની બહાર નીકળીને મત આપવા અપીલ કરી હતી.

રાયબરેલીના ઉમેદવાર અને કોંગ્રેસ નેતા રાહુલ ગાંધીએ સોશિયલ મીડિયા પોસ્ટમાં લખ્યું છે કે, 'આજે મતદાનનો પાંચમો તબક્કો છે. પ્રથમ ચાર તબક્કામાં જ સ્પષ્ટ થઈ ગયું છે કે લોકો બંધારણ અને લોકશાહીની સુરક્ષા માટે ઊભા થયા છે અને ભાજપને પરાજિત કરી રહ્યા છે. નફરતના રાજકારણથી કંટાળીને આ દેશ હવે પોતાના મુદ્દા પર મતદાન કરી રહ્યો છે. યુવાનો નોકરી માટે, ખેડૂતો એમએસપી અને દેવામાંથી મુક્તિ માટે, મહિલાઓ આર્થિક નિર્ભરતા અને સુરક્ષા માટે અને શ્રમિકો વાજબી વેતન માટે મતદાન કરી રહ્યા છે.'

આ ઉપરાંત કોંગ્રેસના પૂર્વ અધ્યક્ષે લખ્યું છે કે, 'લોકો પોતે આઈએનડીઆઈએની સાથે મળીને આ ચૂંટણી લડી રહ્યા છે અને દેશભરમાં પરિવર્તનનું વાવાઝોડું ફૂંકાઈ રહ્યું છે. હુ અમેઠી અને રાયબરેલી સહિત સમગ્ર દેશને અપીલ કરૂ છું કે તેઓ મોટી સંખ્યામાં બહાર આવે અને તેમના પરિવારની સમૃદ્ધિ, પોતાના અધિકારો અને ભારતની પ્રગતિ માટે મતદાન કરે.'

બીજી તરફ પ્રિયંકા ગાંધીએ પણ સોશિયલ મીડિયા પોસ્ટ દ્વારા લોકોને મતદાન કરવાની અપીલ કરી હતી. પ્રિયંકા ગાંધીએ લખ્યું છે કે, 'તમારા એક વોટથી ગરીબ પરિવારની મહિલાના ખાતામાં વાર્ષિક એક લાખ રૂપિયા આવશે. દરેક નાગરિકને રપ લાખ રૂપિયા સુધીની મફત સારવારની સુવિધા મળશે. યુવાનોને ૩૦ લાખ સરકારી નોકરીઓ મળશે. યુવાનોને વાર્ષિક ૧ લાખ રૂપિયાની એપ્રેન્ટિસશીપ મળશે. એસસી-એસટી-ઓબીસીને યોગ્ય ભાગીદારી મળશે. તમારો એક મત દેશની લોકશાહી અને બંધારણની રક્ષા કરશે, તેથી તમામ દેશવાસીઓને વધુમાં વધુ મતદાન કરવા અપીલ છે. તમારો એક મત દેશને મોંઘવારી, બેરોજગારી અને આર્થિક સંકટમાંથી મુક્ત કરશે અને દેશને મજબૂત કરશે.'

જો આપને આ પોસ્ટ ગમી હોય તો શેર કરો...