જામનગરની સગીરા પર સામુહિક દુષ્કૃત્ય ગુજારી હત્યા કરાયાના આક્ષેપ સાથે અરજી

Author: નોબત સમાચાર

જામનગરની સગીરા પર સામુહિક દુષ્કૃત્ય ગુજારી હત્યા કરાયાના આક્ષેપ સાથે અરજી

મોરબીના મકનસરના વાડી વિસ્તારમાંથી મળ્યો મૃતદેહઃ

જામનગર તા. ૧૮: જામનગરની એક સગીરાનું કચ્છના શખ્સે અપહરણ કર્યા પછી તે સગીરાનો મૃતદેહ મોરબી જિલ્લાના મકનસર ગામના વાડી વિસ્તારમાંથી મળ્યો હતો. આ સગીરાએ વિષપાન કર્યાનું જણાવાયું હતું. તે પછી શરીર પર ઈજાના નિશાનો નિહાળી સગીરાના પરિવારે તેણી પર સામુહિક દુષ્કૃત્ય ગુજારાયાનો અને તેણીની હત્યા કરાઈ હોવાનો આક્ષેપ કરી તપાસ માટે માગણી કરી પોલીસમાં અરજી પાઠવી છે.

જામનગરના એક વિસ્તારમાંથી થોડા દિવસ પહેલાં એક સગીરાનું અપહરણ થયું હતું. તેણીને ત્રણ સંતાનનો પિતા એવો શખ્સ પોતાની સાથે લઈ ગયા પછી આ સગીરા તથા તે શખ્સે ઝેરી દવા પી લીધી હતી. આ સગીરાનું મૃત્યુ નિપજ્યું છે તે પછી સગીરા પર સામુહિક દુષ્કૃત્ય આચરી તેણીની હત્યા કરવામાં આવી હોવાના આક્ષેપ સાથે પોલીસમાં અરજી કરાઈ છે.

આ સગીરા પોતાના ઘરેથી ગુમ થયા પછી કચ્છના રાપર તાલુકાના આદીસર ગામના વ્યક્તિએ સગીરાના મામાને ફોન કર્યાે હતો અને તેણી ભરત ભાણાભાઈ આદરોજીયા નામના શખ્સ સાથે હોવાની વિગત આપી ભરત તથા તે સગીરાએ ઝેરી દવા પી લીધાનું કહ્યું હતું.

ત્યારપછી સગીરાના પરિવારે દોડધામ કરતા મોરબીના મકનસર ગામ પાસે વાડી વિસ્તારમાં આ સગીરાનો મૃતદેહ મળી આવ્યો હતો. મોરબી પોલીસે તેનો કબજો લઈ પીએમ કરાવ્યું હતું. મૃતદેહનો કબજો મળતા જામનગર લાવવામાં આવ્યો હતો જ્યાં સગીરાના પરિવારને તેણીના શરીર પર ઈજાના નિશાન જોવા મળતા તપાસની માગણી સાથે પોલીસને અરજી કરાઈ છે.

જો આપને આ પોસ્ટ ગમી હોય તો શેર કરો...