ઓખાના દરિયામાં માછીમારી કરી રહેલા યુવાનનું અકસ્માતે ઈજા થતાં થયું મોત

Author: નોબત સમાચાર

ઓખાના દરિયામાં માછીમારી કરી રહેલા યુવાનનું અકસ્માતે ઈજા થતાં થયું મોત

ટ્રેનની હડફેટે અજાણ્યા વૃદ્ધનું મૃત્યુઃ

જામનગર તા. ૭: ઓખાના દરિયામાં દોેઢ મહિના પહેલાં માછીમારી માટે ગયેલા એક યુવાનનો હાથ બોટની વીંચમાં આવી ગયા પછી તેઓને ગંભીર ઈજા થઈ હતી. આ યુવાનનું સારવારમાં મૃત્યુ થયું છે. જામનગરમાં દિગ્જામ સર્કલ નજીક રેલવે ટ્રેક પર એક અજાણ્યા વૃદ્ધ ટ્રેનની હડફેટે ચડ્યા પછી મોતને શરણ થયા છે. પોલીસે બંને બનાવની તપાસ હાથ ધરી છે.

દેવભૂમિ દ્વારકા જિલ્લાના ઓખામાં માછીમારી માટે આવીને રહેલા મૂળ નવસારી જિલ્લાના જલાલપોર તાલુકાના કૃષ્ણપુર ગામના અશ્વિનભાઈ શાંતિલાલ ટંડેલ નામના યુવાન અલ-સમન-દીવાનશા નામની બોટમાં ગઈ તા.૨૧ સપ્ટેમ્બરના દિને માછીમારી માટે ગયા હતા.

તેઓ જ્યારે ઓખાના દરિયાથી અગિયારેક નોટીકલ માઈલ દૂર હતા ત્યારે તેઓનો એક હાથ બોટની વીંચમાં આવી ગયો હતો. ગંભીર ઈજા પામેલા અશ્વિનભાઈને સારવાર માટે દવાખાને ખસેડવામાં આવ્યા હતા. જ્યાં આ યુવાનનું ગઈકાલે મૃત્યુ નિપજ્યું છે. હીરેનભાઈ ટંડેલે પોલીસને જાણ કરી છે.

જામનગરના દિગ્જામ સર્કલ પાસે પુલ નીચે આવેલા રેલવે ટ્રેક પરથી ગઈકાલે સવારે પસાર થતી એક ટ્રેન હેઠળ સાંઈઠેક વર્ષની વયના લાગતા અજાણ્યા વૃદ્ધ ચગદાઈ ગયા હતા. તેઓનું મૃત્યુ નિપજ્યાનું લાખાબાવળના સ્ટેશન માસ્તર વિનોદ આર. પ્રસાદે પોલીસ સમક્ષ જાહેર કર્યું છે.

જો આપને આ પોસ્ટ ગમી હોય તો શેર કરો...