સાંઢીયા પુલ પાસે મોટરમાંથી અંગ્રેજી દારૃની ૭૨ બોટલ પકડી પાડતી એલસીબી

Author: નોબત સમાચાર

સાંઢીયા પુલ પાસે મોટરમાંથી અંગ્રેજી દારૃની ૭૨ બોટલ પકડી પાડતી એલસીબી

લતીપર રોડ પરથી ચાર બોટલ દારૃ સાથે એક ઝબ્બેઃ

જામનગર તા. ૧૨ઃ જામનગરના ગોકુલનગર નજીક સાંઢીયા પુલ પાસે મોટરમાંથી ગઈકાલે એલસીબીએ દારૃની ૭૨ બોટલ સાથે એક શખ્સની અટકાયત કરી છે. તેણે સપ્લાયરનું નામ ઓકી નાખ્યું છે. ધ્રોલના લતીપર રોડ પરથી બાઈક પર લઈ જવાતી દારૃની ચાર બોટલ પોલીસે કબજે લીધી છે.

જામનગરના ગોકુલનગર વિસ્તારમાં એક મોટરમાં દારૃની હેરાફેરી થઈ રહી હોવાની બાતમી એલસીબીના દિલીપ તલાવડીયા, સંજયસિંહ, કાસમ બ્લોચ, હિતેન્દ્રસિંહને મળતા ગઈકાલે સાંજે પીઆઈ જે.વી. ચૌધરીની સૂચના અને પીએસઆઈ આર.કે. કરમટા, પી.એન. મોરીના વડપણ હેઠળ સ્ટાફે વોચ રાખી હતી.

તે દરમિયાન ગોકુલનગરના સાંઢીયા પુલ પાસેથી પસાર થતાં જીજે-૩-કેપી ૨૧૮૪ નંબરની આઈ-૨૦ મોટરને શકના આધારે રોકી તલાશી લેવાતા તે મોટરમાંથી ભારતીય બનાવટના અંગ્રેજી શરાબની ૭૨ બોટલ નીકળી પડી હતી. આ જથ્થા સાથે ગોકુલનગરમાં રહેતા મનસુખભાઈ ઉકાભાઈ સીંગલ ઉર્ફે મનુ આહિર નામના શખ્સની અટકાયત કરાઈ છે.

આ શખ્સની પૂછપરછ કરાતા તેણે આ જથ્થો પોરબંદરના રાણાવાવના હનુમાનગઢ ગામના બઘાભાઈ રબારીએ મોકલાવ્યો હોવાની કબૂલાત કરી છે. એલસીબીએ રૃા.૩ લાખની મોટર, રૃા.૫ હજારનો મોબાઈલ અને રૃા.૨૮,૮૦૦ની કિંમતનો દારૃનો જથ્થો કબજે કર્યાે છે.

ધ્રોલ તાલુકાના લતીપર ગામ પાસેથી ગઈકાલે રાત્રે પસાર થતાં જીજે-૧૧-કે ૮૪૭૫ નંબરના બાઈકને પોલીસે શકના આધારે રોકાવ્યું હતું. તેના ચાલક કૃષ્ણપુરના હેમત કુરજીભાઈ તળપદાની તલાશી લેવાતા તેના કબજામાંથી અંગ્રેજી દારૃની ચાર બોટલ નીકળી પડી હતી. પોલીસે બોટલ તથા બાઈક કબજે કર્યા છે.

જો આપને આ પોસ્ટ ગમી હોય તો શેર કરો...