સલાયાના માલવાહક વહાણની સિકોતેર ટાપુ પાસે જળસમાધિઃ એક ખલાસી ગુમ

Author: નોબત સમાચાર

સલાયાના માલવાહક વહાણની સિકોતેર ટાપુ પાસે જળસમાધિઃ એક ખલાસી ગુમ

બાકીના આઠ ખલાસીને બીજી બોટે ઉગામી લીધાઃ

સલાયા તા. ૩૧: સલાયાના એક વહાણવટી આસામીનું માલવાહક વહાણ સિમેન્ટ ભરીને રવાના થયા પછી દરિયામાં વાતાવરણ પલટાતા વહાણ હિલોળે ચડ્યું હતું. આ વહાણે સિકોતેર ટાપુ પાસે જળસમાધિ લઈ લીધી છે. તેમાં રહેલા નવ પૈકીના આઠ ખલાસીનો બચાવ થયો છે અને એક ખલાસી ગુમ થઈ ગયા છે. તેઓની ભાળ મેળવાઈ રહી છે.

ખંભાળિયા તાલુકાના સલાયામાં વસવાટ કરતા વહાણવટી હનીફભાઈ કાસમભાઈ સંઘાર નામના આસામીનું સાડા સાતસો ટનની ક્ષમતાનું સફીના અલ જીલાની નામનું વહાણ નવ ખલાસી સાથે ગઈ તા.૨૬ના દિને સિમેન્ટ ભરીને યમન તરફ રવાના થયું હતું.

આ માલવાહક વહાણ બુધવારે સવારે જ્યારે યમનના સ્કોટ્રા પોર્ટ પાસે પહોંચ્યું ત્યારે પલટાયેલા વાતાવરણના કારણે હિલોળે ચઢ્યું હતું. બીડીઆઈ ૨૮૪ નંબરનું આ વહાણ હાલક દોલક થયા પછી તેમાં રહેલા નવેય ખલાસીઓએ આંખો સામે મોત ભાળી લીધુ હતું. તે પછી આ વહાણે સિકોતેર ટાપુ પાસે જળસમાધિ લીધી છે.

આ ખલાસીઓએ જીવ બચાવવા માટે મરણીયા પ્રયાસ શરૂ કર્યા પછી યમનની એક ફીશીંગ બોટે તેમાંથી આઠ ખલાસીને ઉગારી લીધા છે. જ્યારે આદમ હસન નામના ખલાસી દરિયાના અફાટ પાણીમાં ગુમ થઈ ગયા છે. તેઓની ભાળ મેળવવા તજવીજ કરાઈ રહી છે.

ઉપરોક્ત બનાવ અંગે ઈન્ડિયન સેલીંગ વેસલ એસોસિએશનના મંત્રી આદમ ભાયાએ ઈન્ડિયન એમ્બેસીને જાણ કરી છે.

જો આપને આ પોસ્ટ ગમી હોય તો શેર કરો...