મુદ્દલ કરતા વધુ વ્યાજ ચૂકવ્યા પછી પણ વધુ વ્યાજની માગણી કરી મારકૂટ

Author: નોબત સમાચાર

મુદ્દલ કરતા વધુ વ્યાજ ચૂકવ્યા પછી પણ વધુ વ્યાજની માગણી કરી મારકૂટ

યુવાન તથા તેના મિત્રને ધોકા-ઢીકાપાટુથી માર મરાયોઃ

જામનગર તા. ૧૦: જામનગરના એક યુવાને રૂા.૧૦ હજાર વ્યાજે લઈ રૂા.૨૪ હજાર ચૂકવી આપ્યા હોવા છતાં વધુ રૂા.ર હજારની માગણી કરી ત્રણ શખ્સે આ યુવાન તથા તેના મિત્રને ધોકાવ્યાની પોલીસમાં ફરિયાદ કરવામાં આવી છે.

જામનગરના પટેલ કોલોની વિસ્તારની શેરી નં.૯ના છેવાડે આવેલા શાંતિનગરમાં રહેતા વિશાલ રણછોડભાઈ ડાભી તથા વિપુલ નામના યુવાનો બુધવારે રાત્રે ગાંધીનગર સ્મશાન પાસે આવેલા તેમના ખેતરથી પરત જતા હતા ત્યારે માર્ગમાં રાંદલનગરવાળા યુવરાજસિંહ જાડેજા તથા બે અજાણ્યા શખ્સે તેઓને રોકી લીધા હતા.

આ શખ્સોમાંથી યુવરાજસિંહે વ્યાજના રૂા.૨ હજાર બાકી છે તેમ કહી રૂા.૧૦ હજારની સામે રૂા.૨૪ હજાર જ આપ્યા છે તેમ કહી ઉઘરાણી કરતા વિશાલે મારી પાસે હવે પૈસા નથી તેમ કહેતા યુવરાજસિંહ અને બે અજાણ્યા શખ્સે હુમલો કરી માર માર્યાે હતો. યુવરાજસિંહે ધોકાના ફટકા માર્યા હતા અને વિપુલને અજાણ્યા શખ્સોએ ઢીકાપાટુથી ધોકાવી નાખ્યો હતો. આ બાબતની સિટી બી ડિવિઝન પોલીસ સ્ટેશનમાં ફરિયાદ કરવામાં આવતા પોલીસે આઈપીસી, જીપી એક્ટ તથા નાણા ધીરધાર અધિનિયમની કલમોે હેઠળ ગુન્હો નોંધ્યો છે.

જો આપને આ પોસ્ટ ગમી હોય તો શેર કરો...