જી.જી. હોસ્પિટલની નવી ઈમારતમાં બબાલ કરનાર દંપતી સામે કરાઈ રાવ

Author: નોબત સમાચાર

જી.જી. હોસ્પિટલની નવી ઈમારતમાં બબાલ કરનાર દંપતી સામે કરાઈ રાવ

બંનેએ ગાર્ડને ગાળો ભાંડી ઝપાઝપી કરી હતીઃ

જામનગર તા.ર૪ : જામનગરની જી.જી. હોસ્પિટલ પાછળ નવી ઈમારતમાં શુક્રવારે રાત્રે એક શખ્સ તથા તેની પત્ની એ સિક્યુરિટી ગાર્ડ સાથે ઝપાઝપી અને ગાળાગાળી કરી હતી. તેની પોલીસમાં ફરિયાદ કરાઈ છે. આ શખ્સ પાસેથી છરી મળી આવી હતી. પોલીસે દંપતી સામે ગુન્હો નોંધ્યો છે.

જામનગરની જી.જી. હોસ્પિટલની નવી ઇમારતમાં શુક્રવારે રાત્રે સાડા દસેક વાગ્યે એક શખ્સ પોતાની પત્ની સાથે મળી અન્ય વ્યક્તિઓ સાથે ઝઘડો કરતો હતો. આ વેળાએ ત્યાં સિક્યુરિટી ગાર્ડ તરીકે ફરજ પર રહેલા ખોડાભાઈ અવસરભાઈ કાસુન્દ્રાએ આ જગ્યાએ ઝઘડો ન કરવા અને છૂટો પડી જવાનું કહેતા મામલો બીચક્યો હતો.

બ્લોચ નામના આ શખ્સે પોતાની પત્ની સાથે મળી સિકયુરીટી ગાર્ડને ગાળો ભાંડી હતી અને ઝપાઝપી કરી હતી. આ શખ્સના પત્નીએ તમે મને હાથ અડાડશો તો તમારી વિરૂદ્ધ ખોટી ફરિયાદ દાખલ કરાવીશ તેમ કહી ધમકી આપી હતી. જ્યારે બ્લોચ નામના શખ્સની તલાશી લેવાતા તેની પાસેથી છરી મળી આવી હતી.

આ બાબતની સિક્યુરિટી ગાર્ડ ખોડાભાઈએ સિટી બી ડિવિઝન પોલીસ સ્ટેશનમાં ફરિયાદ નોંધાવી છે. ઉપરોક્ત મામલો જ્યારે બન્યો ત્યારે કોઈએ તેનો વીડિયો ઉતારી સોશિયલ મીડિયા પર વાયરલ કરતા આ પ્રકરણ વધુ ચકચારી બન્યું હતું.

જો આપને આ પોસ્ટ ગમી હોય તો શેર કરો...