વન વિસ્તારમાંથી રેતી ભરીને જતાં ટ્રેક્ટરને અટકાવાયા પછી વનરક્ષકને ગાળો-ધમકી

Author: નોબત સમાચાર

વન વિસ્તારમાંથી રેતી ભરીને જતાં ટ્રેક્ટરને અટકાવાયા પછી વનરક્ષકને ગાળો-ધમકી

મોટા આંબલાના બે શખ્સ સામે ફરજ રૂકાવટની રાવઃ

જામનગર તા. ૧૩: દ્વારકા જિલ્લાના વન વિભાગના વનરક્ષક તથા તેમની ટીમ દ્વારા ગઈકાલે ફોરેસ્ટ એરીયામાંથી ગેરકાયદેસર રેતી ભરીને જતું એક ટ્રેક્ટર પકડ્યા પછી ટ્રેક્ટર ઓફિસે લઈ જવાની તજવીજ કરતા બાઈક પર આવેલા મોટા આંબલાના બે શખસે તેઓની ફરજમાં રૂકાવટ કરી ગાળો ભાંડી ધમકી આપી હતી.

દેવભૂમિ દ્વારકા જિલ્લાના ફોરેસ્ટ વિભાગમાં વનરક્ષક તરીકે નોકરી કરતા અને ખંભાળિયા નજીકના સલાયામાં ફોરેસ્ટ કોલોનીમાં વસવાટ કરતા આર.વી. જાડેજા નામના અધિકારી તથા સ્ટાફ દ્વારા ગઈકાલે ફોરેસ્ટ એરિયામાં કરવામાં આવી રહેલા પેટ્રોલીંગમાં એક સ્થળેથી ટ્રેક્ટરમાં રેતી ભરાતી હોવાનું દૃષ્ટિગોચર થયું હતું.

તે સ્થળે ધસી ગયેલી ફોરેસ્ટ વિભાગની ટીમે એક ટ્રેક્ટર પકડી પાડ્યું હતું. જેમાં ગેરકાયદેસર રીતે ભરી લેવામાં આવેલી રેતી હતી. તે ટ્રેક્ટરને ફોરેસ્ટની કચેરીએ કાયદેસર કાર્યવાહી માટે ખસેડવાની તજવીજના ભાગરૂપે ફોરેસ્ટ સ્ટાફે ત્યાંથી પ્રયાણ કરતા મોટા આંબલા ગામની સીમમાં રાજનશા પીરની દરગાહ તરફ જવાના માર્ગ પર એક બાઈકમાં બે શખ્સ ધસી આવ્યા હતા.

આ શખ્સોએ મોટર સાયકલ આડુ ઉભુ રાખી દઈ રેતી ભરેલુ ટ્રેક્ટર રોકાવ્યું હતું તેથી વનરક્ષક આર.વી. જાડેજા ત્યાં પહોંચ્યા હતા. આ વેળાએ મોટા આંબલા ગામના શબ્બીર જુનસ દેસરાણી તથા તેના ભાઈ સાજીદ જુનસ દેસરાણી નામના આ શખ્સોએ વનરક્ષક તથા સ્ટાફને ગાળો ભાંડી મારી નાખવાની ધમકી આપી હતી. ફરજમાં રૂકાવટ અંગે વનરક્ષકે વાડીનાર મરીન પોલીસ મથકમાં ફરિયાદ નોંધાવી છે.

જો આપને આ પોસ્ટ ગમી હોય તો શેર કરો...