ભાડૂતી જગ્યાના રક્ષણ માટે માતા, પિતા તથા ભાઈ સામેના દાવાને રખાયો મંજૂર

Author: નોબત સમાચાર

ભાડૂતી જગ્યાના રક્ષણ માટે માતા, પિતા તથા ભાઈ સામેના દાવાને રખાયો મંજૂર

કાયમી મનાઈહુકમ ફરમાવતી અદાલતઃ

જામનગર તા. ૧૩: જામનગરના રણજીતસાગર રોડ પર ઓશવાળ આઈસ ફેક્ટરી નજીક તુલસીદાસ રણછોડદાસ ડોડીયા નામના આસામીએ સુડી બનાવવાના તુલસી સરોતા વર્કસ, દીપક મેટલ વર્કસ, મનોજ સરોતા વર્કસ નામના ભાડુતી જગ્યામાં શરૂ કર્યા હતા. તુલસી તથા દીપક મેટલમાં તુલસીદાસ અને તેમના પુત્ર પ્રતીક તથા દીપક સાથે કામ કરતા હતા.

તે દરમિયાન તુલસીદાસ તથા તેમના પત્ની મુકતાબેન અને મનોજ તુલસીદાસે એકસંપ કરી પ્રતીક તથા દીપક અને તેમના પત્નીઓને હેરાન કરવાનું ચાલુ કરતા મનદુખ થયું હતું અને તે પછી વર્ષ ૨૦૧૪માં સમજુતી કરાર કરાયો હતો. જેમાં તુલસી સરોતા, દીપક મેટલ નામના કારખાનાનો કબજો તે બંનેને સોંપાયો હતો. આમ છતાં પિતા તુલસીભાઈ અને માતા અવારનવાર હેરાન કરવા ઉપરાંત પ્રતીક તેમજ દીપક વિરૂદ્ધ સાચી-ખોટી પોલીસ ફરિયાદ કરતા રહેતા હતા અને ભરણપોષણ મેળવવા અદાલતમાં પણ પહોંચ્યા હતા.

તે પછી વર્ષ ૨૦૧૮માં તુલસીભાઈએ એક અન્ય વ્યક્તિને સાથે રાખી પુત્રો પાસેથી કારખાનાની જગ્યા કઢાવી લેવા દબાણ કરતા પ્રતીક તથા દીપકભાઈએ અદાલતમાં માતા, પિતા અને ભાઈ મનોજ સામે દાવો કર્યાે હતો. અદાલતે વચગાળાનો હુકમ કર્યાે હતો. ત્યારપછી પ્રતીક તથા દીપક દોડીયા તરફથી દલીલ કરાઈ હતી કે, વર્ષ ૨૦૧૪માં થયેલા સમજૂતી કરાર મુજબ તેઓ નિયમિત રીતે મકાન માલિકને ભાડુ આપે છે અને કોઈપણ પક્ષકારે આ કરાર રદ્દ કરવા કાનૂની કાર્યવાહી કરી નથી. અદાલતે બંને પક્ષની દલીલ સાંભળ્યા પછી પ્રતીક તથા દીપક દ્વારા કરાયેલા દાવાને મંજૂર રાખી તેઓના ભાડુતી કારખાનામાં માતા, પિતા અને ભાઈએ અડચણ ન કરવી તેવો હુકમ કર્યાે છે. વાદીઓ તરફથી વકીલ ચિરાગ નથવાણી, ધર્મેશ રાઠોડ રોકાયા હતા.

જો આપને આ પોસ્ટ ગમી હોય તો શેર કરો...