બાંગલાદેશમાં હિન્દુ રિક્ષાચાલકની ક્રૂર હત્યા

Author: નોબત સમાચાર

બાંગલાદેશમાં હિન્દુ રિક્ષાચાલકની ક્રૂર હત્યા

છેલ્લા રપ દિવસમાં આઠમા હિન્દુનું ખૂન...

ઢાંકા તા. ૧૩: બાંગલાદેશમાં વધુ એક હિન્દુ યુવાનની હત્યા થઈ છે. રપ દિ'માં આઠમી ઘટના છે. બાંગલાદેશમાં હિન્દુ લઘુમતીઓની સલામતી અંગે ચિંતાઓ વધી રહી છે.

બાંગલાદેશમાં વધુ એક હિન્દુ યુવાનની હત્યા કરવામાં આવી છે. ફેંગુઆના દગનભુઆમાં સમીર દાસ (ઉ.વ. ર૮) ને માર મારીને હત્યા કરવામાં આવી હતી. આરોપી તેની ઓટોરિક્ષા લૂંટીને ભાગી ગયો હતો. પોલીસ હત્યારાઓને શોધી રહી છે. છેલ્લા રપ દિવસમાં બાંગલાદેશમાં હિન્દુની આ આઠમી હતયા છે.

પોલીસના જણાવ્યા અનુસાર સમીર દગનભુઆના માતુભુઆ યુનિયનના રામાનંદપુર ગામનો રહેવાસી હતો, અને લાંબા સમયથી બેટરીથી ચાલતી ઓટોરિક્ષા ચલાવીને તેના પરિવારનું ગુજરાન ચલાવતો હતો. પરિવારના સભ્યોએ જણાવ્યું કે, જ્યારે સમીર રવિવારે રાત્રે સમયસર ઘરે પાછો ફર્યો નહીં, ત્યારે તેઓએ તેની શોધ શરૂ કરી. બાદમાં પોલીસને જાણ કરવામાં આવી. લગભગ ર વાગ્યાની આસપાસ દક્ષિણ કરીમપુર મુહુરી બારી નજીક લોકોને સમીરનો લોહીથી લથપથ મૃતદેહ મળ્યો.

પોલીસે જણાવ્યું કે, આ હત્યા એક આયોજિત કૃત્ય હતું. સ્ટેશન હાઉસ ઓફિસર ફ્યાઝુલ અઝીમ નોમાને જણાવ્યું કે, પરિવારની ફરિયાદના આધારે એફઆઈઆર દાખલ કરવામાં આવી છે અને આરોપીઓને ઓળખવાના પ્રયાસો ચાલી રહ્યા છે.

સૂત્રોના જણાવ્યા અનુસાર દગનભુઆ વિસ્તારમાં સમીર કુમાર દાસની હત્યા ૧૧ જાન્યુઆરીની સાંજે થઈ હતી. સમીર કુમાર દાસ કાર્તિક કુમાર દાસ અને રીના રાણી દાસનો મોટો પુત્ર હતો. ઘટનાની માહિતી મળતા પોલીસ ઘટના સ્થળે પહોંચી. મૃતદેહનો કબજો લીધો અને તેને પોસ્ટમોર્ટમ માટે ફેની જનરલ હોસ્પિટલમાં મોકલી આપ્યો.

પોલીસનું કહેવું છે કે, ઓટોરિક્ષા ગાયબ થવાથી લૂંટના ઈરાદાથી હત્યાની શંકા ઊભી થાય છે, જો કે અન્ય કારણોને નકારી કાઢવામાં આવ્યા નથી. આ ઘટના એવા સમયે બની છે, જ્યારે બાંગલાદેશમાં હિન્દુ સમુદાય વિરૂદ્ધ હિંસા, ધાકધમકી અને અસુરક્ષાની ઘટનાઓ વારંવાર નોંધાઈ રહી છે. માનવાધિકાર સંગઠનોનું કહેવું છે કે, નબળા પગલાં અને વિલંબીત ન્યાયને કારણે લઘુમતી સમુદાયમાં ભયનું વાતાવરણ સર્જાયું છે.

જો આપને આ પોસ્ટ ગમી હોય તો શેર કરો...