ભાટીયા નજીક લીમડી પાસે બાઈક સાથે મોટર ટકરાતા કેનેડીના પ્રૌઢનું થયું મૃત્યુ

Author: નોબત સમાચાર

ભાટીયા નજીક લીમડી પાસે બાઈક સાથે મોટર ટકરાતા કેનેડીના પ્રૌઢનું થયું મૃત્યુ

ટુંપણીની ગોળાઈમાં છકડાનું ગોથું: વૃદ્ધનું મૃત્યુઃ

જામનગર તા.૧૫ : કલ્યાણપુરના લીમડી પાસે મોટર તથા બાઈક ટકરાઈ પડતા કેનેડી ગામના પ્રૌઢનું મૃત્યુ થયું છે. દ્વારકાના ટુંપણી નજીક મગફળી ભરેલો છકડો ગોથું મારી જતાં ઈજા પામેલા પોસિત્રા ગામના વૃદ્ધ પર કાળનો પંજો પડ્યો છે. ઉપરાંત બીમારીથી પીડાતા ભાણવડના મોખાણા ગામના યુવાનનું મૃત્યુ થયું છે.

કલ્યાણપુર તાલુકાના લીમડી ગામ પાસેથી શનિવારે સાંજે પસાર થતી એચઆર ૨૬-એફએલ ૬૨૦૦ નંબરની મોટરના ચાલકે જીજે-૩૭-સી ૯૮૭૧ નંબરના બાઈક સાથે ધડાકાભેર અકસ્માત સર્જયો હતો. જેમાં કેનેડી ગામના બાઈકચાલક પેથાભાઈ જમન ભાઈ કણઝારીયાનું ગંભીર ઈજા થવાથી મૃત્યુ થયું છે. મોટરના ચાલક સામે રમેશભાઈ કણઝારીયાએ પોલીસમાં ફરિયાદ નોંધાવી છે.

દ્વારકા તાલુકાના પોસિત્રા ગામના દેવજીભાઈ મુળજીભાઈ પાંજરીવાલા નામના વૃદ્ધ તથા તેમના પુત્ર મહેશભાઈ શનિવારે સવારે રિક્ષા છકડામાં મગફળી ભરીને જતા હતા ત્યારે ટુંપણી ગામ પાસે ગોળાઈમાં છકડો પલ્ટી મારી જતાં ગંભીર ઈજા પામેલા દેવજીભાઈનું મૃત્યુ નિપજ્યું છે.

ભાણવડ તાલુકાના મોખાણા ગામમાં રહેતા વેજાભાઈ હીરાભાઈ મોરી નામના યુવાન એકાદ વર્ષથી ડાયાબિટીસની બીમારીથી પીડાતા હતા. આ યુવાનનું બીમારીના કારણે શનિવારે મૃત્યુ થયું છે. બાલુભાઈ કરણાભાઈ મોરીએ પોલીસને જાણ કરી છે.

જો આપને આ પોસ્ટ ગમી હોય તો શેર કરો...