શિવરાજપુર બીચ પર આંતરરાષ્ટ્રીય પતંગ મહોત્સવઃ અવનવી પતંગોએ આકર્ષણ જમાવ્યું

Author: નોબત સમાચાર

શિવરાજપુર બીચ પર આંતરરાષ્ટ્રીય પતંગ મહોત્સવઃ અવનવી પતંગોએ આકર્ષણ જમાવ્યું

૧૪ દેશના અને બે રાજ્યોના પતંગબાજો ઉપસ્થિતઃ

ખંભાળિયા તા. ૧પઃ ગુજરાત પ્રવાસન નિગમ અને જિલ્લા વહીવટી તંત્રના સંયુક્ત ઉપક્રમે શિવરાજપુર બીચ પર જિલ્લા પંચાયત પ્રમુખ શ્રી રિદ્ધિબા જાડેજાના અધ્યક્ષસ્થાને આંતરરાષ્ટ્રીય પતંગ મહોત્સવ-ર૦રપ યોજાયો હતો.

આંતરરાષ્ટ્રીય પતંગ મહોત્સવમાં ગ્રીસ, ઈટલી, પોલેન્ડ, સ્વિત્ઝરલેન્ડ સહિત ૧૪ દેશના અને બે રાજ્યના પતંગબાજોની આકાશમાં ઊડતી અવનવી અને રંગબેરંગી પતંગો આકર્ષણનું કેન્દ્ર બની હતી.

આ પ્રસંગે અગ્રણી પી.એસ. જાડેજાએ જણાવ્યું હતું કે આનંદ ઉત્સાહનું આ પર્વ છે. મુખ્યમંત્રી ભૂપેન્દ્ર પટેલ અને પ્રવાસન મંત્રી મૂળુભાઈ બેરાના નેતૃત્ત્વમાં આંતર રાષ્ટ્રીય પતંગ મહોત્સવનું આયોજન શિવરાજપુર બીચના આંગણે થયું હતું.

આ પ્રસંગે દેશ-વિદેશના પતંગબાજો, ગ્રામજનો, મહેમાનો તથા અધિકારીઓ-કર્મચારીઓ અને વિદ્યાર્થીઓ ઉપસ્થિત રહ્યા હતાં. કાર્યક્રમના અંતે મહાનુભાવોએ પણ પતંગબાજો સાથે પતંગ ચગાવીને ઉત્સવની ઉજવણી કરી હતી. ઉપરાંત સાંસ્કૃતિક કાર્યક્રમ રજૂ કરવામાં આવ્યો હતો.

આ પ્રસંગે ડે. કમાન્ડરશ્રી, દ્વારકા નગરપાલિકા ચીફ ઓફિસર ઉદય નસિત, ધાનાભા જડિયા, અશોકભાઈ સિમાણી, રાજેન્દ્ર પરમાર, ગુજરાત ટુરિઝમના અશોકભાઈ, નીરવભાઈ ચૌહાણ સહિતના ઉપસ્થિત રહ્યા હતાં.

જો આપને આ પોસ્ટ ગમી હોય તો શેર કરો...